Shillong, Nailur 10: palat sawphew (40) tylli ki ain kiba la don lypa jong ka jylla bad ki ain jong ki lai tylli ki District Council (KHADC JHADC bad GHADC ) kiba don ka jingiadei kaba jan bad ka jingteh lakam ia ka jingiakren halor ka jingrung kyrthep ki bar jylla la ong u bah John Kharshiing.
Katkum ka rai Sorkar Jylla ban pynkhreh ia ka draft jong ka ain thymmai halor ka jingrung kyrthep jong ki bar jylla ngi sngewdei ban ai jingmut ban thung ia ka committee kaba thymmai ban bishar bniah ia kitei ki ain kiba la don lypa, khnang ban ioh ban nang pynkhlain bad khnang ba kitei ki ain kiba la don lypa kin long kiba trei kam ha ka ban dain kuna bad set patok ia kiba pynkhien ia kitei ki ain bad ha kaba ka dei ban don ka bor ‘enforcement’ kaba khlian bad kaba lait na ki jingtynjuh jong ka jingbam sap bad ban khmih ia ka jingtrei kam bad ban teh lakam ia kita kiba pynkhien ia kitei ki ain kiba bun jong ka jylla.
“ Ngi sngewdei ban pynpaw ba kitei ki ain ki Acts, Rules bad ki Regulations kiba la don lypa ynda la pynthymmai bad pynkhlain ia ki, ki dei ban don ka jingiadei kaba janai bad kaba iatrei lang hapdeng ki ain bad ki tnad bapher bapher bad khamtam bad ka ain kaba ka Sorkar ka dang pynkhreh ban thaw thymmai, bad ka ain kaba thymmai ka dei ban lait na ka jingiatyngkhuh hapdeng ki bor bapher bapher kum ka Sorkar Jylla, ki Autonomous District Councils bad ki Hima/Elaka.”
Na ka liang jong u bah John u la phah ia kane ka juh ka jingthoh kaba u la ai sha u myntri rangbah ka jylla sha ki nongialam jong ka seng Congress u SC Mawak, bah DD lapang bad sha baroh ki myntri cabinet jong ka sorkar. Ha kaba u la kdew lang ruh ia kita ki ain. (SP News)
