Shillong, Jymmang 02: Kum shibynta ban pynbeit ia ka kynrum kynram hapoh ka Hima Mawiang, kaba dei kawei na ki Khasi States,(Mawiang State), ka tnad Elaka, KHADC, ka la thung ia u Acting Chief uba ar u Basan Jrastan L Peinlang ,ha ka 24tarik April 2013, hadien ba ka Executive Dorbar ka la pynpaw ia ka jingpyrshah kaba jur ia u Acting Chief uba rim u Bah Cheerfulman Syiem, na ka daw ba um juh khot ia ki Basan ha ba u lum ia ka Executive Dorbar, jong ka Hima, kumba long haduh kine ki sngi, ki bor KHADC kim pat pynjari lane thaw ia ka Act lane ki Rules jong ka Hima Mawiang Syiemship.
Kumba long haduh kine ki sngi, na ki 25 Khasi States, ki bor KHADC ki dang dep thaw ia ki Act ha ki 12 tylli ki Hima Khasi States, katba ki 13 tylli ki Hima Khasi States kim pat don ki Acts lane ki Rule, ki synshar beit katkum ki Riti Dustur kiba khlem pat pynlong kum ki Act lane ki Rule.
La ban kdew hangne ba lait noh ki ar tylli ki Khasi States kata ka Hima Nongstoin bad Hima Maharam, kiba la don ruh ki Rules ba la pynjari da ki bor KHADC, kiwei pat ki 23 tylli ki Hima Khasi kim don Rule ba la thaw da ki bor KHADC, kaba la ialam bad plie lad bun sien sha ka jing mushlia ki bor jong ka sain pyrthei, kat haduh ban da kiew iing lieh iingsaw bad teng teng shaduh ban da poi shaduh ka iingbishar kaba khlieh (Supreme Court) duh ka Ri india. Kine ki jinglong ki wanrah ki jingeh kiba khraw ia u khun u hajar haba um don u Syiem uba pura bad khamtam ka wanrah ia ka jingbym iaineh ki jingsynshar (unstability administration).
Haba phai pat sha ki 29 tylli ki Elaka Sirdarship, ki bor KHADC katkum ka website www.khadc.nic.in ( Acts, Laws, Rules, Regulation) haduh kine ki sngi dang dep thaw bad pynjari tang 7 tylli ki Act jong ki Hima Sirdarship kiba juh hap hapoh kaba ngi khot (British India) ym kum ki Khasi States kiba la don ka kyrdan (Indian States).
Ka Hima Mawiang Syiemship, (Mawiang State) kaba dei kawei na ki 25 Khasi States, ka kynthup kumba 24 tylli ki shnong, kynthup phra tylli ki shnong khlei Garo bad Hajong , ki ia kynduh u pud u sam bad ka Hima Nobosohpoh Syiemship, Maharam Syiemship, Nongkhlaw Syiemship, Nongspung Syiemship, bad ka Myriaw Syiemship, bad ka don ruh ka jaka (dewlynong) sha ka thain Nolikata, kaba hap hapoh ka jingsynshar jong ka Hima Mawiang, kaba khap u pud Indo- Bangladesh.
Ki hynniew ngut ki Myntri lane ki Basan ki dei na ka kur Basan Lyngdoh Peinlang, Basan Thabah, Basan Pariong sawkpoh, Basan Pariong Shipoh, Basan Marthong, Basan Marwein, kynthup ruh ia u Basan Bah HS Lyngdoh Nonglait, MLA, Nongstoin, u CEM, & EM bad MDC KHADC barim, jong ka Hima Mawiang Syiemship.
Ngi iai khmih lynti ba ki bor Sorkar Jylla Meghalaya, ki MDC badon burom, bad ki bor KHADC kin trei borbah bad thaw lad thymmai kumno ban iarap ia kitei ki Khasi States, bad ki Elaka Sirdarship da kaba thung ia ki briew kiba kyrpang ban pyndep tang ia kitei ki Act bad ki Rule kiba lah ban pyndep baroh da kaba suk tang hapoh lai bnai.(SP News)
