Jowai, Naitung 16: Ban pynneh pynsah ia ka mariang kam dei shuh tang ka kam jong ka sorkar ne ki seng trei mon sngewbha hynrei mynta ka la rung wat ha ki kut ki jaid. Ka Kur Pomthied ka la kdew ia kanuksa ha kaba ka la pynlong ia ka jingthung dieng ha kine ki sngi ha ka shnong Jarain.
Ia kane ka jingthung dieng la saindur da u president jong ka kur u bah Tom Pomthied bad kum ka kur ka la shim ia kane ka rai ban leh ei ei na ka bynta ka mariangbad ki la pynlong ka jingthungdieng ha ka shnong Jarain.
Ka kur pomthied ka la pan ia ki ding symbai na ka tnad khlaw jong ka sorkar jylla bad ka la ioh 100 tylli ki tynrai ding ia kiba la tip kum ki diengdoh kiba la bha ha ki jaka phlang ia kine ki dieng baroh la thung ha katei ka shnong.
Na ka liang jong u MLA jong katei ka jaka u Bah Stephan u la ai ka jingiaroh ia kane ka kur kaba la shim ia kane ka lynti ban pynilemia ki wei ban ia shim khilang kumno ban pynneh pynsah ia ka mariang da kaba ia thung dieng lang.(SP News)
