Dawki, Jymmang 28: Ki khar Bangladesh mynta ka sngi ha ka por 2 baje mynstep ki la kiew sha India lyngba ka Wah Dawki bad leit tuh ia ki shiphew tylli ki lieng kiba dei jong ki briew na ka shnong Darang, kane ka long katkum ka jingleit ujor jong ki trai lieng ha police station ha Dawki mynta ka sngi.
Ki lieng kiba la shah tuh mynta ka sngi ki long ki jong u Bah Harmon Ryngksai, Katinos Ryngksai, Seborlang Ryngksai, Morisoi Ryngksai, Bailas, Mar, Head Syngkrem bad jong u Bah Dilip kine baroh kidei na ka shnong Darang.
Kine ki lieng ki dei kiba la buh ha Khat Darang bad Khat Kongwang. La iathuh ba kawei kawei ka lieng ka shongdor T.10000 tyngka. Ia kine ki lieng la pyndonkam ha kaba kit ia ki mar rep bad ia ki briew kiba ia leit ia wan hapdeng ka Dawki bad ka shnong Darang.
Haba kren ha u SP News Agency na ka liang jonguBah M Ryngksai u la ong ba ka long kaei kaei kaba sngewlyngohha kaba ki shipai BSF kiba ap pahara haruh jong kane ka wah Dawki bad ki pulit Home Guard kiba ap ia ka jingkieng Dawki kim lah ban iohi haba ki khar Bangladesh ki rung sha India ban tuh ia ki lieng jong ki riew shimet.
Kane kam dei ka sien kaba nyngkong hyrei ka la dei ka sien kaba ar ba shah tuh ki lieng jong ki nong India ha ki kar Bangladesh ha katei ka juh ka jaka.(SP News)
