Shillong, Naitung 21: Ka jingwan jong ki samla na kane ka jylla Meghalaya ban ioh rung ha ka kam shipai ka long kaba ishongkun ha kaba palat 3500 ngut ki la leit ban ai kyrteng, na kitei la lah ban pynareh ha kine ki ar sngi haduh 1000 ngut.
Kane ka jingtuid jong ki samla kane ka jylla sha katei ka jingpynrung kam shipai ka long kaba bha shibun ha kaba ki samla kane ka jylla mynta ki la phaikhmat sha ka tand shipai ba kan long ka lad ioh kam bad ha ka juh ka por ka long ka jingsarong ban don ha ka kynhun shipai jong ka Ri India.
Kane ka jingpynrung kam shipai ka dang iaid mynta ha madan polo bad ka jingjied ia ki samla lyngba ki kyndon ba bun rukom kumba la buh ka la iaid beit bad na ka liang jong ka District Adminstration ruh ki la long kiba la kloi ban iarap lem ia ka kynhun shipai ban pyniaid beit.
Ia ka entrance test na ka bynta kito baroh kiba la jop ha ka jingiamareh kan long ha ka 28 tarik mynta u bnai ha Army Public School. Ban pynlong ia ka jingjied ia ki samla ha ka kam shipai kaba khuid kaba suba la pynlong la ka jong ka jong katkum ka kam kaba ki la dep ban apply.(SP News)
