Shillong, Jymmang 08: Wat ha pdeng ka jingjur jong u slap bad kajingdum ka suin bneng ki samla jong ka jylla Mizoram kila ia tuid sha ka jaka pynrung kam shipai ia kaba la pynlong ar sngi lynter ha ka nongbah Aizwal ha madan Rajiv Gandhi Astro-Turf Stadium, Mualpui ia kaba la pynlong ha ka 7 bad 8 tarik mynta u bnai.
Ha kine ki ar sngi ki samla kiba la poi ha kane ka jaka pynrung kam shipai kiba la ia poi baroh ki long 4700 ngut, U Lat jong ka jylla Mizoram U Vakkom Purushothaman u la leit ban jngoh ia kane ka jingpynrung kam shipai. Ha kane ka jingleit jong u la ong ba ka jylla Mizoram ka dei ka jylla kaba la kiew bha ha ka jingnang jingstad bad ka por ka la dei ba ki dei ban wad ia kikam ha kylleng ka bynta jong ka Ri India.
U la ia nujor ruh ia ka jylla kaba ma u u wan, ka jylla Kerala u la ong ba kane ka jylla ka phah ia ki briew sha kylleng ka pyrthei ba kin trei kane ka dei na ka daw ba ka jylla Kerala ka long ka jylla kaba la bun kiba nang ba stad. Ha kane ka sngi ki la don bun ruh ki heh sorkar kiba la ia poi ban sakhi lang ia kane ka jingpynrung kam shipai.
Naka liang jong Brig RV Singh Deputy Director Recruiting, (NE States) u la iathuh ha u Lat jong ka jylla Mizoram ia ka rukom pynrung kam ha ka kynhun shipaijong ka Ri India. U tei u heh shipai u la ai ka jingiaroh ia ka sorkar jylla kaba la kyrshan met bad mynsiem ha kaba ia dei bad kane ka jingpynrung kam.(SP News)
