Shillong, Rymphang 13:Shibynta ban pynkhlain ia ka rukom treikam jong ka seng baroh kawei, ka Confederation of Ri Bhoi People (CORP) ha ka jingialang jong ka Central Executive Committee (CEC) kaba la long ha ka sngi Balang ha Dorbar Hall ka shnong Mawdiangum, Nongpoh ka la rai ban shim da kawei ka sur ban don noh ia ka kam ‘Working President’ khnang ba ka seng kum ka kynhun treimon sngewbha kan nanglah ban ai ka jingshakri ba kham bha shuh shuh ia ka Ri bad ka Jaidbynriew.
Kumta ha katei ka sngi hi, ka la jied syndon ia u Bah Bandary Ryntathiang uba dei ruh u President jong ka Eastern Zone kum Working President, u ban ia tynrong lem ia ka lyngkor ba khia na bynta ban shakri ia ki paidbah ka dong Ri Bhoi nalor kiwei kiwei ki nongkitkam ka sengkmie.
Ia u bah Bandary la thung bad pynshkem kum u Working President da bah D.S Sulein, President Rangbah ha ryngkat ka jingdonlang ki nongialam ka sengkmie kynthup ia u bah David M Kharnaior, General Secretary, bah Nickson Kharkrang, Sports Secretary, bah Robin Markhap Organising, Secretary, bah Gershome Hat, Publicity Secretary, bah James Syiem, General Western Zone, bah Robest Kylla, President Umsning Circle bad la sakhi lang ruh da ki spah ngut ki dkhot ka seng kynthup ia ki samla, ki riew rangbah na ki dong bapher bapher jong ka Ri Bhoi District.
Ha kane ka CEC, shwa ban jied ia u Working President la pynsngew ia ki report treikam jong ki Unit, ki Circle bad ki jong Zone bapher bapher bad la iatai sani ruh ia ka jinglong jingman bad ka jingeh ba ki paidbah ka Ri Bhoi District ki iakynduh na ka por sha ka por khamtam ha ki thain khappud tang namar ka jingiai buh teng jong ka Sorkar Jylla ban pynbeit ia u pud u sam ka Jylla Assam.
Halor kitei ki mad ba la iakren, ka seng ka la rai ban nangiai bud dien lyngba ki tnad treikam bapher bapher jong ka Sorkar Jylla, kiba dei peit ia ka bha ka miat bad ka roi ka par na bynta ki paidbah nongshong shnong ka Ri Bhoi baroh kawei. (SP News)
