Nongpoh, Jymmang 12: Ka Dorbar Shnong Umsohlang, Raid Iapngar, Ri-Bhoidistrict, ka la ioh ban jied thymmai noh ia u Rangbah Shnong bad kiwei ki nongkitkam thymmai .
U Bah Nicholas Thongni u la long u Rangbah Shnong bathymmai uba ki paidbah ki la ibit ban bynshet ha ki tyrpeng jong u, katba u Secretary pat la jied ia u Bah John Fisher Shangpliang.
Nalor kitei ki nongkitkam ba hakhmat, kiba long ruh ki nongialam shnong, ka Dorbar ka la ibit ruh ban jied sa 11 ngut ki dkhot ka Executive Committee.
Na ka liang ka Dorbar Shnong ka kyrpad ia ki briew kiba nabar ka shnong bad kiba wan donkam ha ki kam shnong, ba kin sngewbha ban ithuh ia kitei ki nongialam shnong bathymmai bad kin iaid lyngba jong ki ha kino kino ki kam shnong kam thaw.
Ha kajuh ka por ka Dorbar Shnong ka kyrpad ruh ia ki bor sorkar jylla na ki tnat treikam bapher bapher jong ka district, ba kin sngewbha ban ithuh noh naduh mynta ia kitei ki nongialam shnong kiba la shah jied ha ki paidbah, la ha kino kino ki bynta kiba iadei bad ki skhim ban ai sha ki paidbah nongshong shnong bad kiwei kiwei ki jingdonkam, la ong u Secretary thymmai katei ka shnong.(SP News)
