Shillong, Naiwieng, 28: U General Secretary ka Ri Bhoi Youth Federation (RBYF) Bah LK Sawkmie ula kyntu ia ki paidbah ba kin wan iashimbynta lang ha ka jingialang kaban pynlong da ki sengbhalang ha ka ha ka 30 tarik mynta u bnai ha Madan Student Jaiaw kaban sdang ha ka por 12 baje mynsngi.
“Nga kyntu ia ki paradoh parasnam jong ka bri u hynniewtrep,ki longkmie ki longkpa, ki khun samla kynthei bad shynrang, ki riewpawkhmat, ki nongialam shnong jong ki shnong bapher bapher ba kin iamih ban iapoilang ha katei ka jingialang kumba ka jaidbynriew hi kala ai ia ka jingkyrshan ia ki jingiakhih kiba la pynlong da ki seng bhalang ha ki bnai bala dep kumta ngi kyrpad ban ia poi ryntihlang sha katei ka jingialang ha kaba ki sengbhalang ki ieng ban dawa pyntreikam ia ka ILP kaban long ka ain kaban iada ia ka ri bad jaidbynriew na ka jingwan rung laitlan ki Mynder ri bad ki bar jylla kaba ap ka jingma kaba khraw ia ka jingbynriew jong ngi baroh kawei” la ong u bah Sawkmie.
Ka seng ka pynrem jur halor ka jingkren u Myntri Rangbah ka jylla kaba ula pynpaw ba dei ban tohkit ia ki samla pule kiba la leit iashimbynta ha ka Ministerial Committee for Public Consultation on Meghalaya Regulation of Landlords and Verification of Tenants Bill bad kila pynpaw ia ka jingpyrshah ia katei ka bill kaba mut ban iuhroit ia ki trai ri trai muluk.
“Ka long ka jingkyndit kaba khraw ba u Dr Mukul un phah tohkit ia kitei ki samla kiba la leit iashimbynta ha katei ka jingiaphylliew jingmut namar ba ki pyrshah jur ia katei ka bill bad kaba lyngngoh ka long ba ha katei ka sngi hadien bala wai ka jingialang u bah Prestone Tynsong uba pyniaid ia ka jingialang kum Chairman ula iaroh ia kitei ki samla kiba la wan iashimbynta kiba pynpaw ia kaei ka jingsngew ka jongki halor katei ka bill, hynrei u Dr Mukul pat u phah tohkit pynban ka pynpaw ba baroh ki hap ban ngeit beit ia kaei kaba u ong ma u kaba pynpaw ba ngim don hok shuh ban pynpaw ia ka jingsngew ka jong ngi bad kane ka pawshai ba u Dr Mukul u kwah hi ban synshar donbor bad leh donbor ha kane ka jylla jong ngi” la ong u L Sawkmie.
Na ka liang ka KSU Jaiaw Circle bad ka KSU Mawkhar Circle kila kyntu ia ki paidbah ka jylla ba kin iamih ryntih ban poi khnang khnang ha ka jingialang kaban pynlong da ki sengbhalang ha ka 30 tarik ha kaba ki heh nongialam sengbhalang kin wan ban kren ban pynsngewthuh halor ka jingdawa ban pyntreikam ia ka ILP. (SP News)
