Shillong, Nailar 13: U Bah Klip Lynshing president jong ka seng Meghalaya Democratic Party (MDP) jong ka Mawkynrew lem bad ki 20 ngut kiwei ki nongkit kam jong ka seng Congress mynta ka sngi ki la leit ban rung sha ka sem Congress.
Da kane ka jingleit rung jong ki sha ka seng Congress kan long ka jingkyrkhu ia ka seng Congress ha katei ka jaka bad u president jong ka Mawkynrew Block Congress Committee u Bah Kynshen Lynshing u la ong ba kan iarap ia ki ban poi sha ka jingjop ha ka election MDC kan ban long ha u snem 2014.
U Bah Klip haba kren ha ki nongthoh khubor mynta ka sngi ha Shillong Press Club u la ong ba ha dien ka jingrem jong ka MDP ha kane ka election kaba la dep, ka la buh ia ki ha ka jingeh kumno ban leh bad shano ban leit. Haba ki iashong ban ia kren sani ki lap ba dei tang ka seng Congress kaba la lah ban ai ka jingshakri iaki paidbah.
Halot katei ka nongrim ki nongialam jong ka seng MDP na katei ka constituency bad ki nongkyrshan jong ka ki la shim ia ka rai ba kin ai noh ia ka jingkyrshan ia ka seng Congress da kaba leit ban pyniasoh noh bad kane ka seng bad ban pynkhlain ia ka khnang ba kan jop ha kane ka MDC ban wan.(SP News)
