Jowai, Kyllalyngkot 13: Ka KSU Mynska Unit hapoh ka jingialam u samla Franklin Sayoo, President ka seng ka la leit ban ia kynduh ia ki bor peit jong ka tnad Revenue ka MeECL(Khliehriat), bad ujor /pan jingpynshai ruh sha/na ka ophis, lyngba u ma Iakai(Asst EE) ha ka 10 tarik mynta u bnai halor ka jingbym juh poi ki Bai Bording (Electricity bill) ha ki por ba la dep bad ka jingioh pdiang ki paitbah tang ia ki ‘receipt’ kiba la dep ban arsien ia ki jingthoh (manipulation & over writing).
“Kat kum ka jinglap ka seng , ka long ba ka bai bording jong kipaitbah ka lah kynjoh shaba palat ha kaba kim juh ioh ki BILL na u briew ba la thung da kane ka tnad treikam ha kine ki snem ba la leit hynrei tang ia ki ‘receipt’ kiba ban arsien ia ki jingthoh hakata ka rukom ba ki longiing ki hap siew tam kumba 1000 tyngka ei ei bad ki paitbah kim tip katno ‘unit’ ki pyllut”, la pynpaw u samla Franklin.
Ha kane ka jingiakynduh bad utei u sahep, la ai lang ha u ia ki katto katne ki ‘receipt’ ba lah ban lum na kito ki longing ba shah ktah bad la lap ruh ia ka jinglehtuh ha kane ka kam na ka jingbniah/nujor ia ki ‘receipt’ bad ki kopi jong ki ba la don ha ophis. Kumta, ka seng ka kyntu jur ia ka ophis ba kan shim khia ia kane ka kam da kaba tohkit ia ka daw jong ka jingbym poi ki ‘Electricity bill’ sha ka shnong Mynska bad ruh ia kane ka am thok kam shukor.
Ki bun ki longing ha kane ka shnong ki long kiba duna ha ka kamai kajih bad ki duna kiba la nang la stad, bad ka jingleh shukor/thok bad shim kabu ia ki da kane ka rukom ka long ka jingibein ia ki bad ka ktah shibun eh ia ki. Ka seng ka dang ap ia ka kaiphod/jubap na kane ka ophis bad kan iai buddien ia ki kam tad haduh ba kiba donkti ha kane ka kam bamsap la kynnoh kin ioh ia ka kuna bad ki longing ba shah ktah kin ioh ia kahok jong ki.
Ha kane ka sngi, la ia don lang u samla Streamly S. Niangti(General Secretary KSU JHDU), Samla L. Tariang (Genl. Secy KSU Laskein Circle), nongialam ka Laskein Circle bad ki dkhot ka KSU Mynska Unit.(SP News)
