Shillong, Jylliew 14: U Bah Fairson J Jana uwei na ki polling officer ha ka election MLA kada la dep u la ai ka jingujor pyrshah ia ki SDO Election jong ka Mairang na ka daw ba u khlem ioh ia ka jingsiew katkum ka jingbthah jong ka election commission na katei ka ophis.
Ha dien ba u Bah Jana u la pan jingtip lyngba ka RTI la lap ba la siew ia ki ba don bynta ha ka election tang na ka bynta saw sngi kata T. 1000 tyngka katba ka election commission jong ka Ri India ka la btah ban sniew na ka bynta ki sngi kaba ki pynlut na ka bynta ka election. U Bah Jana u la ong ba katkum ka shithi ba la thung ia u ka long baroh phra sngi.
Ha dien ba u la ioh ia ka jingthoh na ka RTI u bah Jana u la lap ba ka don ka jingleh shukor da kaba khate ia ka bai nongsngi jong ki namar ha ka jaka ba kin ioh 8 sngi ki ioh tang saw sngi. Na kane ka daw u sa phah ia kane ka jingujor sha ka election commission jong ka Ri India.
Katum ka jingbthah ka election commission ka long ba ia u presiding officer ka jingsiew ka long T.250 shi sngi bad ia ki polling ophisar ka long T.175 shi sngi bad ia ki polling officer class IV ka long T.100 shi sngi, na ka 22bad 23 tarik u bnai rymphang ka bai bam kan long T.100 tyngka shi sngi ia kane ruh ki khlem ioh. (SP News)
