Shillong, Lber 21: Da ka jingtrei shitom jongki shipai BSF ki la lah ban pynsngewthuh ia u Dikki M Sangma u wei na ki snar jong ka seng lehnoh GNLA ba un wan ban pyndem wait ban im noh ka jingim kaba im lem kum ki para nongshong shnong.
U ne u lehnoh ha dien ka jingiakren kaba la biang bha bad ki shipai BSF ha ka 20 tarik mynta u bnai u la wan ban pyndem wait ha khmat jong ki BSF ha Tura.
Ha ka jingiathuh jong u Dikki M Sangma, u la ong ba u la pyniasoh bad kane ka seng lehnoh ha u snem 2011 ha u bnai Iaiong bad la phah ia u sha ki lum Durama ha East Garo Hills na ka bynta hynriew bnai ban hikai kumno ban pyndon kam ia ki suloi AK.47, ban pynbtthei bom bad kiwei ki jait tiar siat ba bun rukom katkum kaneka juk kaba mynta.
U Dikki u la iathuh ba u la don kti ha kiba bun ki kam tuh kam lute bad ki kam dawa pisa jubor ha ki thain Kherapara, Barengapara, Chokpot, Garobadha bad kiwei ki bynta jong ka Garo Hills. Ha ka juh ka por na ka liang jong ki BSF ki la lap ruh na u kawei ka Identity Cards kaba la ai ha u Dikki ia kaba la soi da u Sohan D Shira u ba dei u C-N-C jong kaneka seng lehnoh.(SP News)
