New Delhi, Jymmang 03: U myntri jong ka sorkar pdeng u K V Thomas u ba dei peit ia ka tnad sam bam sam dih jong ka sorkar pdeng mynta ka sngi u la wanrah ia ka “National Food Security Bill” hapoh ka iing dorbar parliament jong ka Ri India, Lok Sabha.
Ia kane ka Bill la wanrah hapoh ka iing dorbar ha u bnai Nohprah jong u snem 2011 hynrei namar bay m pat ia pdiang da baroh ki dkhot jong ka iing dorbar la phah noh iaka sha ka Standing Committee kaba dei peit ka kam bam kam dih.
Ha dien ba kane ka committee ka la dep ban ia kynduhia baroh ki sorkar jylla ha kane ka Ri India bad ia ki riew paw khmat ka la phah ia kane ka koiphot jong ka sha ka Speaker jong ka iing dorbar ha u kyllalyngkot mynta u snem bad ha dien ba la bishar bniah na ka liang jong u myntri u la wanrah biangia kane ka bill hapoh parliament mynta ka sngi.
Katkum kane ka Bill lada ka parliament ka pynlait ka long ba ka sorkar pdeng ka hap ban bei kum ka bai subsidy haduh T.1,24,724 crore ha ka shi snem. U khaw yn sam ha dor lai tyngka na ka bynta ki paidbah nongshong shnong na ka bynta san kilo manu bnai. Naka bynta ki kynthie kiba ar met kin ioh ryngkat ka pisa kaba T.6000 tyngka.
Katkum kane ka bill ka long ba kane ka skhim thymmai lada ka trei kam ka jingsam khaw kan long haduh 75% ha ki nongkyndong bad 50% ha ki jaka sor. Katba naka bynta kito kiba hap hapoh ka kyrdan AAY kin ioh 35 kilo u khaw ha ka dor lai tyngka. Kane ka Bill ka dang don mynta hapoh parliament katkum ka jingpynlait khubor jong ka tnad pathai khubor ka sorkar pdeng ka PIB.(SP News)
