Shillong, Lber 22: U myntri rangbah ka jylla u Dr Mukul Sangma u ba bat ruh ia ka pla pisa jong ka sorkar jylla mynta ka sngi u la wan rah ia ka mang tyngka na ka bynta jong u snem 2013-2014 ha ka jingduna kaba la kot haduh T 520 klur tyngka.
Ha kane ka mang tyngka kaba la wanrah mynta ka sngi hapoh jong ka iing dorbar thawain jong ka jylla u myntri rangbah ym shym la buh ia kano kano ka khajna kaba thymmai lait noh tang ia u dewiong ha kaba la pynkiew na ka T. 290 shitone sha ka T. 675 shi tone.
Na ka liang jong ka sorkar ka la thung ia u additional advocate general jong ka jylla ban peit kumno ban wad li lad ki lynti kiba thymmai ban ioh pynmih pisa shuh ia ka jylla bad kane ka task force ka la dep ban ai ia ka kaiphot sha ka sorkar jylla ba mynta ka dang don ha ka jingbishar bniah. Na ka liang jong ka sorkar kan sa pyntrei kam ia kane ka kaiphot da ka jingiasngewthuh jingmud lang bad kit and sorkar kiba dei peit.
Ha jingkren jong u myntri rangbah ka jylla u la ong ba kaei kaba jylla ka pynmih na ka bynta ka roi ka par bad na ka bynta ban pyntrei ia ki kam pynroi ha kane ka jylla ka long tang 20% na ka jinglut baroh kaba bun la bei da ka sorkar pdeng. Ban pynbiang ia ki jingdon kam jong ki paidbah ka sorkar kam ban she ban shim da ka ram na ki iew ki hat.
Ka sorkar jylla ka la mang antad b aka jinglut baroh na ka bynta kane ka snem mang tyngka 2013-2014 kan long T.8,609 klur na kane ka pisa ka ban wan na ka sorkar pdeng ha ka plan kan long T.4,761 klur bad la khien antad ba ka jylla mynta kan pynmih na la de haduh T.1,371 klur.
Ka jinglut pat na ka bynta kane ka snem mang tyngka ka sorkar ka la mang antad ba kan kot sha ka T.9,289 klur kane ka pyni ia ka jingkiew ha ka jinglut da 22.2% na kaba lut ha u snem mang tyngka kaba la dep. Ka jinglut naka bynta ban siew ia ki tulop baroh bad kiwei ki jingsiew kan kot sha ka T.7,333 klur bad na ka bynta ki kam pyntoi pat kan poi sha ka T.1,956 klur.
Kane ka mang tyngka kaba la wanrah mynta ka sngi kam shym don kano kano k aba phyla hynrei ka long kumbas juhlong man ka por na kawei ka snem sha kawei pat, ka jingkiew ha ka jingmang pisa na ka bynta kit and sorkar ka dei ka jingpynkiew kaba juhleh na kawei ka snem sha kawei pat.(SP News)
