Shillong, Lber 19: U Myntri rangbah ka jylla u Dr Mukul Sangma mynta ka sngi u la wanrah ia ka mang tyngka na ka bynta jong u snem 2014-2015 ha ka jingduna pisa kaba la kiew sha ka T.527 klur tyngka.
Kane ka mang tyngka kaba la wanrah mynta ka sngi da u myntri rangbah ka dei ka mang tyngka kaba khlem da don kano kano ka khajana kaba thymmai kaba ka sorkar ka kwah ban pynkit sha ki paidbah.
Ha ka jingkren jong u myntri rangbah hapoh ka iing dorbar la ong ba ka jinglut kaba ka sorkar kala buh jingkhein kan long haduh T. 11,893 klur bad ka jingmih kaba ka sorkare ka khmih lynti ka long haduh T.11,820 klur. Ka sorkar ka khmih lynti ban ioh ia ka jingiarap na ka sorkar pdeng haduh T.6,527 klur bad ka sorkar jylla ka khmih lynti ba ka lah ban pynmih ka long T.1,886 klur.
La iathuh hapoh jong ka iing dorbar ba ka 13th Finance commission hjong ka sorkar pdeng ka la mang pisa ia ka jylla Meghalaya haduh T.3,924 klur hynrei na katei ka sorkar ka dang ioh tang T.2671 klur bad kaba dangsah mynta ka long T.1,253 klur.
Namar ka jingsah dien jong ka jylla ka sorkar jylla kala pan pisa na ka 14th Finance Commission, ba kan ai jingiarap haduh T.50,000, kane ka long ka jingpan jong ka sorkar jylla namar ki dang don bun ki kam kiba ka sorkar ka dei ban leh na ka bynta jong ki paidbah.(SP News)
