Shillong,Rymphang,12: U Bah Sherrard Wahlang uba la pyndep ia ka jingpule na Singapore ha ka Business bad marketing mynta ka kynti ula wahrah ia ka rukom rep kaba kham pher kata ka dei ka jingrep ia ki soh mynken bad kine ki soh mynken la wanrah kyrpang nabar ka ri.
Haba ia kren bad ki nongthoh khubor mynta ka sngi u Sherrard ula ong ba ha kane ka jylla ki briew hangne ki ioh ban bam tang ia ki soh mynken ba ju bam man ka sngi bad ia u soh mynken jhur kane ka jingthmu ban wanrah ia kine ki jait sohmynken kiba nabar ka ri ka long ba ki paidbah jong kane ka jylla kin ioh ban mad sa kiwei pat ki jait sohmynken kiba kim pat ju ioh mynno mynno ruh
U Sherrard ula sdang ia kane ka kam rep soh mynken mynta la hynñiew bnai ha Ri Bhoi District, Nongpoh ha kaba ula wanrah ia ki khyndai tylli ki jait sohmynken kiba na California Canada bad Trinidad bad ula wanrah khyndai tylli ki jait sohmynken hynrei tang hynriew jait ki sohmynken ki long bad ki lai jait ki soh mynken ki khlem long na ka daw ba kam ia hap bad ka suin bneng ha kane ka jylla.(SP News)
Kaba kham phylla ka long ba une u samla ula wanrah ruh ia u soh mynken ba la tip kyrteng kum u Red Morouga Scorpion pepper uba sat tam ha ka pyrthei kat kum ka record kaba ula ioh ha u snem 2012-13
Ka jingthmu ba kongsan ban sdang ia kane ka kam ka long ban pynshlur ia ki khynnah samla ban ieng ha la ki jong ki kjat namar na ka liang jong ka Horticulture Nongpoh ki ai ia ki skim ban pynshlur ia ki khynnah samla ban seng ia la ki jong ki kam.
Shuh shuh u samla Sherrald ula ong, ba u don jingthmu ban pynheh ia kane ka kam da ka jingthmu ban lah ruh ban pyniaid iew ia kine ki sohmynken hynrei ia kaba mynta um pat lah namar ka dei tang ka jingsdang ia kane ka kam.(SP News)
