Shillong, Naitung 03: Ki bor ba dei peit ia ka district administration jong ka East Khasi Hills kila sngewkhia bha ha kaba ia dei bad ka jingkiew dor jong ki marbam mardih ha kine ki sngi kiba la leit.
Ka district level price monitoring committee kaba la khlieh da u DC jong ka East Khasi Hills ka juh khot ia ka jingialang ban peit ia ka jinglong ka dor ka mur ha iew ha hat bad na ka liang jong ka committee kala dep buh ia ka dor ka mur.
Na ka liang jong u DC u la maham ia ki nongkhaii ba lada don kiba buhrieh iaki marbam mardih da ka jingthmu ban pynkiew ia ka dor ha iew ha hat ym pynshitom tyngeh lada don kiba leh kumta.
Na ka liang jong ka ophis jong u DC kan phah ia ki ophisar sha kylleng ki jaka ban jurip ha kaba ia dei bad ka jingdon jong ki marbam mardih ban peit ba kan nym don kano kano ka jingleh thok ha kaba ia dei bad ka dor ka mur. (SP News)
