Shillong, Risaw 16: Wat la ka don ka jingkhot pakhang shnong kaba 12 kynta da ki seng bhalang ban dawa na ka sorkar ia la ILP ban pyntrei kam ha kane ka jylla lashai ka sngi, na ka liang jong ki bor ba dei peit ia ka District Administration kin pynlong beit ia ka jingiamareh Cycle ha Tura kumba la buh.
Kane ka jingiamareh cycle kan sdang ha ka por 7 baje mynstep. Kane ka jingiamareh cyle kan long na ka bynta 43 km bad ka phang jong kane ka long ban pynneh pynsah ia ka mariang. Ia kane ka jingiamareh cycle la pynlong da ka Nothern United Club. Kumba ka long mynta palat 300 ngut ki nongwan ia shim bynta.
U Daryl W Momin, president jong ka William Initiative u la ong ba kumba ka long mynta bun bah kiban wan ia shim bynta, la ong ba kim kwah ban pynsah nud ia ki nongiashim bynta kumta ki la rai ban iaid sha khmat bad kane ka jingthmu ka jong ki bad ki la kyrpad ia u DC ba un ia rap lem ia ki.
Na ka liang jong u DC jong ka West Garo Hills u la ong ba ka la don ka jingpynkhreh na ka bynta kane ka kam la slem bha bad ki kwah ban pynlong ia kane ka jingiamareh cycle kaba jop, kumta la rai ban iaid sha khmat bad kyrmen ba kan long kaba jop.
Kane ka jingpynmarah ia ki Cycle kan sdang na Law College Ground, Tura ha kaba yn khaweh lama da u myntri ka tand ialehkai u Zenith M Sangma bad ia kine yn pdaing burom da u myntri rangbah ka jylla u Dr Mukul Sangma ha Madan Ampati bad u nongjop ha kane ka jingianiah cycle yn ioh ia ka khusnam kaba T.50000/- tyngka.(SP News)
