Shillong, Rymphang 18: U Bah Prestone Tynsong, MLA, Minister C&RD, Govt of Meghalaya, bad u Bah John F Kharshiing, ha ka jingleit ialap election ha Nongkren MDC Constituency na ka bynta u Bah Lambor Malyniang, u la ong ba ki Ki paidbah ha Nongkrem bad Mawkynrew kim ioh jingmyntoi lada jied da ki MLA liang pyrshah kum ki MDC.
U Bah Prestone Tynsong, MLA Minister C&RD, u la ong ba u khmih lynti ba Ki paidbah ha Nongkrem bad Mawkynrew ba kin kyntait ia ki MLA liang pyrshah kum ki MDC U la ong ba kumba ka long mynta ka paw shai ba ha kylleng ka Ri Khasi Jaintia ki paidbah ki kwah ban ioh ia ka Congress ha ka District Council bad ka Sorkar Jylla, bad u la ong ba ki paidbah ki duh nong shisha ban jied ia u juh u briew kum u MLA bad MDC, namar mynshwa u la mad kum u MDC bad hadien u la ioh bat ruh kum u MLA bad haduh katno ka long kaba eh ban poi dorbar session ha ka juh ka sngi ha ka juh ka por ha ki ar jaka.
Kata ha Assembly bad ha District Council ha ka juh ka por bad haba u iohi ba ka long kaba shitom ban shakri ar kynrad wat hapdeng ka jingpynbor ki paidbah u la rai ban nym ialeh MDC hadien ba la dep long MLA. U la ong ba ka long ka jingleh bein ia ki paidbah ba u MLA Nongkrem bad Mawkynrew ki ia leh ia ka MDC, ha ka jaka ban ai lad ia ki wei ki pynduh lad ia u paidbah ban ioh ar ngut ki nongmihkhmat.
Na ka liang u Bah John F Kharshiing, u la ong ba kumba ka long mynta baroh ki MDC ki shong lang bad ka Congress ha District Council. Kumta kam myntoi ban jied ia ki seng barit paid namar ynda dep ka election kin sa ia shong lang bad ka Congress. U la ong ba ka Congress ka long ka seng ka iing kaba bun ki kamra teng teng lada dang don kamra ki ioh jaka bad teng teng lada khapngiah ki hap ban ap shwa sharud.
U la ong ba ki paidbah ki la dei ban shu jied ia ka juh ka party kaba synshar ha ka Jylla, bad la kyrpad ia ki paidbah ban ai ka jingjop ia u Bah Lambor Malyniang, Nongkrem bad ia u Bah Bantei Lyngdoh(Bah Paidang) Mawkynrew, baroh ar ngut ki kyrtong Congress khnang ban skhem ka jingsynshar ha District Council, khnang ba kin jied ia u Bah Lambor Malyniang, MDC, Dy CEM, barim, ha jingkren u la kyrpad ia ki paidbah ba kin kylla thiah kylla dem ban puson sani bha iano ban jied ha kane ka MDC Election 2014, bad u la pynkynmaw ia ki paidbah ia ki jingjia ha kaba la don ka jingiakhih ha Smit ha kaba u la wan ban iarap shiteng miet ban pynsuk ia ki paidbah ha ka jingiakynad bad ki pulit.
U la ong ia ki paidbah aiu kan jia ha Smit lada u juh u briew u dei u MDC bad MLA bad lada jia ba baroh ar ki kyrdan ki don sha Delhi kaei kaban jia ia ki paidbah. U bah lambor u la ong ba u ngeit skhem ba ki Paidbah kiba stad jong ka Nongkrem Constituency kin sa shim ia ka rai, ha kaba uwei u briew un bat ia kawei ka kam. U la ong bz wat ha ka kam shnong ki paidbah ba stad ki jied uwei u sordar bad uwei u secretary, kim jied ia u juh u briew ban long Sordar bad ba un long secretary shnong.
Ha kawei ka Liang u la ong ba ka Nongkrem ka don ka lad ban ioh lada donbok ia ka kyrdan CEM. Kumta, u la kyrpad ia ki nongshnong ban ai ia u ka lad sashisien ban ioh ban shakri ia ka constituency katba u MLA un shakri shabar constituency.(SP News)
