Shillong, Iaiong 11: U Pastor Rev Basaiawmoit mynta ka sngi u la thoh sha u myntri rangbah ka jylla u Dr Mukul Sangma ban kyntu ia u ba ka sorkar kam dei ban pdiang ia ka jingkwah ban pynkylla ia ka Sixth Schedule khlem da ia sngewthuh shuwa.
Na ka liang jong u Pastor u la ong ba katkum ka jingtip kaba u la ioh ka long ba ka sorkar ka kwah ban wanrah ia kane ka jingpynkylla ia ka Sixth Schedule hapoh kane ka iing dorbar thawain ka jylla ha kane ka sien shong dorbar mang tyngka kaba mynta ban ai ia ka jingmynjur jong ka sorkar jylla.
Ki daw kiba u Pastor u la ai ba ka sorkar kam dei ban pdiang ia kane ka jingkwah ban pynkylla ka long ba haduh mynta ki paidbah kim pat sngewthuh namar ym don ba tip ka long kumno, u la ong ba dei ban pynkylla ia ka sha ka ktien khasi ban ia shai paidbah.
Ka sorkar kam dei ban klet ba ki syiem khasi ki dang ia soi tang ia ka Instrument of Accession katba ia ka Instrument of Merger, haduh kine ki sngi ym pat ia soi hapdeng ki syiem khasi bad ka sorkar pdeng. Dei ban ia shai shuwa bad sa wanrah hapoh ka iing dorbar ban ia kren bad ynda la ia hun sa ia pdiang ia ka na ka bynta ka jingbha ka jaid bynriew.(SP News)
