Shillong, Naiwieng 12: Ka Seng Hynniewtrep National Youth Front (HNYF), Mawlai Circle ka maham ia kito ki dkhar kiba shong dukan ha Iewduh, Khyndallad ( Police Bazaar) bad ha kiwei kiwei ki jaka kiba pynkiew dor ia baroh ki mar ki mata da kaba kynnoh ba dei na ka daw ka jingiakhih ILP ki Sengbhalang ba ki sa pynkiew dor, haba iadei bad kane ka Seng ka la ioh shibun ki jingujor na ki paidbah kiba thied jingthied bad ka Seng kan sa leh da kaba tyngeh ia kine ki jaitbynriew kiba shim kabu tang ban ioh nong ia ki shimet khlem salia shuh.
Ka seng ka ai jingkyrshan ruh ia u CEM jong ka KHADC, U Bah P.N. Syiem uba la kloi ban long u Ksiang ia ka Sorkar ban iakren noh bad ki Sengbhalang na ka bynta ka ILP bad ka jingshongsuk shongsain jong ka Jylla. Kane ka pyni shai ba u long u briew uba dang pyrkhat na ka bynta ka Jaitbynriew. hynrei ym kum kiwei ki MLA, ki MDC. Congress kiba ieit tang ia ka Shuki bad kiba kloi ban die.
Ka seng ka pynpaw ruh ia ka jingsngewlyngngoh ia ka jingleit khynra ka Meghalaya Urban Development Authority (MUDA) ha ka Sngi Thohdieng hapoh Umsawli. Mawtari, la i kumba leit khynra ia ki riewsniew khlem ka jingpyrkhat shuh ia ki Paradoh Parasnam kiba luilui kiba ym tip ia kaei kaei. Kumta kum ka Seng ka pynrem jur ia ka jingleh jong ka MUDA ryngkat ka jingleit synran lang da ki Magistrate kiba dei ki Khasi hi bad dei hangne, ladei kumba ong u Soso Tham ba ha kawei ka Sngi ngin sa long ki Nongtong Um ne Nongthoh Dieng jongno re jongno bad tang hangne hi la iohi ba ki para doh para snam la jong ba ki la long kum ki Nongtong Um ne Nongthoh Dieng ia la ki Para Khasi hi.
Dei hangne kiba im bad kine ki briew ki dei kita ki briew kiba halor kiba im ha ka juk jong ka jingleh meng ne jingleh heh da kaba hiar thma ia ki duk ki suk, ki sem shiliang ki kup shiliiang. Kum ka Seng ki kwah ban buh jingkylli ia ka MUDA bad ka Sorkar, ba hato ka dei hok mo ban shu leh donbor ia kitei ki briew kiba la shah pynpra ia ka iing ka sem bad ki jingdon jingem jong ki khlem kano kano ka nongrim ne khlem kano kano ka jingpyntip lypa hynrei la shu wan kyndit kyndit kumba khynra ia ki riewsniew?
Ka lyngngoh ruh ia ka jingai FIR pyrshah ia ka President jong ka CSWO ka Kong Agnes Kharshiing. tangba ka don ia ka mynsiem Ieit Ri ne sngewlem ia ki para doh para snam jong la jong, kiba don hangtei ha Umsawli, Mawtari. hynrei ka la shah file da ka FIR. syndon bad ka la shah kem. Balei pat ka Sorkar kam kem ia kito ki MLA ne Minister kiba thung kam kam sop sop, kane ka jingleh jong ki bor bahalor ka long tang ka jingpyntieng ia kiba don ka mynsiem ieit Ri ne ki nongialeh na ka bynta ka bha ka miat ba kin kynran dien noh.
Hynrei ka seng ka pynpaw ba kim long kita ki Khawpud ne ki Ksan Rympei Rem Dorbar ki ban kynran dien noh.kum kito ki Minister ne ki MLA Congress, Independent kiba nud ban shong kli kti bad ban long kum u Dieng Shain Doh ha u Mukul ba tieng ioh duh shuki ne doh kyndang hynrei kan ialeh ne tur beit sha khmat na bynta ka bha ka miat jong ka Bri u HynfiiewTrep, ong ka kyrwoh ba laphah lyngba u S.Rapsang, President ka HNYF Mawlai Circle. (SP News)
