Shillong, Naiwieng 13: Ha dien ka jingpyrshah jong kiba bun ki seng bhalang ia ka jingthu jong ka sorkar ban shah ia ki kompeni bar ri ban wan trei ha ki kam marpoh khyndew, ka sorkar ka la weng ia ka kyntien “ Foreign Direct Investment” bad ha ka jaka jong kan pynshkur ia ki briew jong ka jylla ban ia trei lang bad kiwei.
Ha kaba ia dei bad ka Meghalaya Mines Minerals Policy, 2012 kaba la ioh kotpi da u SP News Agency ka kren shai kdar ha ka para kaba san hapoh jong ka para san wei, ka kren shai kdar ba ka sorkar kana i jingbit na ka bynta ban tih ia ki marpoh khyndew lane ban aiwai, haki katto katne ki bynta jong ki marpoh khyndew.
Ha kane ka policy kaba la pynkhreh da ka sorkar ia kaba yn sa pyntrei kam ha u snem 2013 kumba la kren da u myntri ka sorkar jylla ba dei peit ia ka tnad marpoh khyndew u bah Bindo Lanong, ka kyntien ban ong ba dang shah ia ka ruom tih dewiong kaba ki briew ki juh trei baroh shikatta kam shym la paw ha kane ka policy wat la ka sorkar na ka por sha ka por ka kam ba kan nym don ka jingkhang ia ka jingthih dewiong kaba juhleh baroh shikatta.
Ha kane ka policy 2012 ka paw shai kdar ba baroh ki trai khyndew bad baroh kiba trei ha ka kam ban tih iaki marpoh khyndew ki hap ban pan jingbit na ka sorkar da kaba buh ia ki aplikoshon jong ki lyngba ka ophis jong u Deputy Commissioner kaba kata ka par ka don.
Ha kaba kut jong ka policy ka la kren shai kdar ba ka sorkar ka don ia ka bor ban weng ia ki kyndon kiba la don ha ka policy lane ban pynrung thymmai da kaba pynbnai ha ka jingpynbna sorkar ia kaba la tip kum ka Gazette. (SP News)
