Jowai, Nailar 07: Ki saw tylli ki sengbhalang na East Jaintia Hills District, kiba kynthup ia ka KSU-KC, AJYWO-EJZ, FKJGP-KC Bad ka HNYF-EJZ, ki la pynkhor ia ka sorkar jylla da ka ba byrngem ban ia khih da kaba tyngeh ban pynbor ia ka ban weng noh ia ki shipai iada khappud (BSF) na Khliehriat wut wut lada jia ba ka jingiaid jong ki da ka lynti kaba jai jai kam trei kam satia.
Kum ban shu pynkynmaw kitei ki sengbhalang ba pher ba pher na East Jaintia Hills District, ki la pyrshah jur ia ka jingbuh jong ka sorkar jylla ia kitei ki BSF ha Khliehriat naduh u snem 2012 da ka ba thok ba kin sah tang kumba 6 bnai ei ei hynrei mynta la dap shi snem pura ruh kitei ki shipai kim i don dak don shin ba kin mih noh na katei ka jaka hynrei i kumba ki nang skhem nangskhem pynban.
“Ka Khliehriat ka nongbah jong ka EJHD kam dei ka jaka khappud, ka dang jngai da ki spah kilometre na ki jaka khappud. Kumta ngi pyrshah jur halor ka jingpynkylla ktem shipai (BSF Camp) ka sorkar jylla ia kawei ka jaka jong u paidbah ha khliehriat nalor ba kane ka jingshong jingsah jong ki BSF ha katei ka jaka kam don jingmut satia kat kum ka kamram kaba ka sorkar pdeng ka la mang na ka bynta ki shipai BSF” Ong u Bah Cherity S Suja, General Secretary ka KSU Khliehriat Circle.
“Ko sorkar Meghalaya, ki shipai iada khappud aiu kiba kum kine ha Khliehriat bad kaei ka kamram jong ki lada kim treh ban shong ha ki jaka khappud? Hato ka kamram jong ki kam dei ban iada ia u pud u sam jong ka Ri India” buh jingkylli U Bah Bishar B Ryngkhlem, President ka AJYWO-East Jaintia Zone ia ka sorkar.
“La shisnem mynta ngi la iaishah bad mynta ngi la ngiah ia ka jingthok jong ka sorkar jylla bad ia kane ngin ym aili da lei lei ruh em hynrei ngin pynlong da ka jingiakhih kaba tyngeh lada ia kitei ki shipai yn ym pynmih na Khliehriat” bynrap shuh shuh u Bah T Rymbai President ka FKJGP Khliehriat Circle.
Ki nongialam jong kitei ki saw seng ki la ong ba ka EJHD ka dei ka district kaba dang thymmai bad ki don kam ia katei ka jaka namar dei tang ma ka kaba kham heh ha EJHD ban ioh buh ia ki office sorkar ba pher ba pher na ka bynta ka jingmyntoi jong u paidbah. Sa kawei ruh ka shnong Khliehriat kaba dei ka nongbah jong ka EJHD kaba la khapngiah lypa namar ba ka don ha u National Highway 44 bad namar ba ym don jaka pynieng kali mynta lei lei sa ki BSF. Ia kane ka jaka lah ban pynlong jaka ieng kali.
“Ngin peit sa katto katne taiew, bad shen ngin sa leit ia kynduh ia ka Myntri ba dei peit ia kane, ka Kong Roshan Warjri hynrei lada ym i don dak don shin ei ei ruh em ba ka sorkar kan weng noh ia kitei ki shipai na katei ka jaka, ngin pynlong jingialang wut wut bad ngin pynbna jingiakhih noh da ka ba tyngeh” la pynkut u kyrwoh na u Bah Julius Nongtdu President ka HNYF-East Jaintia Zone.(SP News)
