Shillong, Lber 08: U Nongialam jong ka kynhun ARPA u Bah Ardent Miller Basaiawmoit mynta ka sngi u la jop khlem da don ka jingialeh pyrshah ia ka election Chief Executive Member hapoh ka iing dorbar jong ka Khasi hills Autonomous District Council (KHADC) ha dien ba u bah Pyn Syiem u la weng noh ia lade na ka jingiakhun.
Mar ia sdang ka iing dorbar ka lamphrang jong ka iing dorbar ka kong Telinai Thangkhiew ka la pynbna hapoh ka iing dorbar ba ka la ioh pdiang ar tylli ki nomination na ka bynta ka kam CEM, kawei ka jong u bah Ardent bad kawei jong u Bah PN Syiem.
Ha ka juh ka por ka la pyntip hapoh ka iing dorbar ba kala ioh pdiang ia kawei ka shithi na u bah Syiem ba u la weng noh ia lade na kane ka jingiakhun, da kane ka Lamphrang ka la pynbna ba u bah Ardent u la jop ia kane ka election CEM ha KHADC khlem da don ba ialeh pyrshah.
Ha ka juh ka por na ka liang jong ka lamphrang ka la pyntip bay m shym don ba thep kyrteng na ka bynta ka kam Dy Chairman, ka la don tang kawei ka jong u Bah Pyniaid Sing Syiem, kumta ka la pynbna ba u la shah jied ha katei ka shuki khlem da don ba ialeh pyrshah.
Ha ka jingkren ai khubblei na ka liang jong u CEM barim bad u nongialam jong ka KHUDA u bah PN Syiem ha ka jingkren ka jong u la ong ba kum ka KHUDA kaba don ha ka liang ia tei ka long ban ia treilang bad ka EC ha ki bynta kiba ktah ia ka im ka iap jong ka Jaidbynriew.
U la ong ba ka EC kaba thymmai ka don kam ban don ka jingiajan kaba janai bad ka sorkar namar ka District Council kan nym lah ban trei kam khlem da don ka jingiadei bad ka sorkar ha kiba bun ki liang namar ia ki kam baroh hap ban iaid lyngba jong ka sorkar. La don bun ruh kiwei ki para MDC kiba la ai khublei ha kane ka sngi ban pyndon burom ia u CEM ba thymmai.
Ha ka jingai khublei jong u CEM ba thymmai u Bah Ardent Miller Basaiawmoit u la ong ba, ka District Council kam dei tang na ka bynta ki kam pynroi, hynrei ka jingpyniaid ka dei ban long kaba shai kaba khuid.
Haba kren kyllum jong u CEM ba thymmai ia ka jinglong jong ka District Council, u la ong ba balei ka mih kane ka jingong ba dei ban pynduh noh ia ka District Cpouncil, haba ia dei bad kane la ong ba hap ban da pynshong nongrimn bad ban wad ia ka daw balei ka mih kane ka jingkren.
Ha ka juh ka porn a ka liang jong u CEM ba thymmai u la kypad ia ka seng Congress kaba don ha ka liang iaitei ba kan ia treilang bad ka EC kaba thymmai bad u la ong ba baroh 29 ngut ki MDC ba kin sngewbha ban ia treilang namar u long tang u nongniah ai ba kan neh haduh ba kut ka san snem.(SP News)
