Shillong, Nohprah 20 :U Bah Kodios Thongni u long u kyrtong ba nyngkong eh uba la pynbna ban iakhun ia ka MDC election na Jirang Konstiwensi ha u snem 2014.
U Bah Thongni uba la tyrwa ban iakhun na ka seng HSPDP, ula iaid shakhmat ban pynithuh ia lade sha ki paidbah ka Jirang watla ka party kam pat pynbna ia ka kyrteng ki kyrtong ban iakhun ia ka elekshon MDC.
Haba kren ha ki Nongthoh Khubor ula ong, “Nga la rai ban iakhun ia ka elekshon khnang ba ngan lah ban shakri khambha ia ki paidbah, namar ka mynsiem kam hun ban shakri tang kum ki sengbhalang khamtam ka Jirang konstitwensi kaba don ha khappud bad ka jylla Assam ka la sdang ban shah tyllep ha ki briew nabar jylla.”
Ula ong ka Jirang Konstitwensi ka kham pher na kiwei, ha kaba kane ka konstitwensi ka don bun ki jaidbynriew kum ki Garo, Rabha, Hajong, Mikir bad kiwei kiwei. Ka don ka jingshah liang ka Jirang ha ki nongmihkhmat ha ki kam pynroi.
Kumta, lada nga poi sha ka thong ngan long kum u nongmihkhmat u bym shah liang hangno hangno ia ki kam pynroi ne ki lad jingiarap ba ki paidbah ki dei hok ba ioh.
Kan plie lad ruh ia nga ban iakren ha ka Iing Dorbar ka Council na bynta ban pynneh pynsah ia ka khyndew ka shyiap bad ki shnong kiba la shah klun ha ka sorkar Assam, kumba ka District Council ka ieng ha ka nongrim ban pynneh pynsah ia ka khyndew ka shyiap, ka hok longtrai ia ki khlaw ki btap bad ki riti ki dustur.
Ka Jirang konstitwensi ka im ha ka jingdum, namar naduh Byrnihat, Jorabad, Khanapara, Nongwah Mawtamur, Rani Jirang, Ranibari, Bhalakhawa haduh Rajapara ka don ka jingiaknieh bad ka Assam. “Ka donkam ban pynbeit kloi noh ia u pud u sam” ula bynrap.
Kum ban shu pynpaw ba u Bah Thongni ula long uwei u samla uba la trei shitrhem kum u nongialam sengbhalang ban shakri ia ki paidbah ka thain.(SP News)
