Shillong, Naitung 11: Ka Dorbar Grand Council of Chiefs (kaba kynthup ia Ka Dorbar Ki Khlieh Nongsynshar Ka Ri Hynniewtrep, Federation of Khasi States, Ka Dorbar Ki Dolloi, Ki Sirdarship) kaba la ia kynduh kyrkieh mynta ka sngi 11 tarik July 2013, ha Lumjinsuk, Madanryting, Shillong, hapoh ka jingpyniaid jong u Bah John F Kharshiing, Co-Chairman, MSPB, Chairman, The Grand Council of Chiefs of Meghalaya, Chairman, Ka Dorbar ki Khlieh Nongsynshar Ka Ri Hynniewtrep, ban ia kren halor ka KHADC Village Administration Bill 2013, ka jingpynbeit thymmai ia ka Sixth Schedule, bad halor ka jingpynkhreh ia ka jingiakynduh 13 tarik August 2013, hapoh Khasi National Dorbar Hall, Mawkhar, Shillong.
Hadien ka jingiakren kaba sani ka Dorbar ka la ai bor ha u na ka liang u Bah John F Kharshiing, Chairman, Ka Dorbar ki Khlieh Nongsynshar Ka Ri Hynniewtrep, bad Spokesperson, Federation of Khasi States, ban pynbeit ia ka jingiakynduh ia u Bah Pynsngainlang N Syiem, MLA & MDC, CEM, u Bah L Blah, MDC, EM i/c Elaka, KHADC, ha ka 15 tarik July 2013 por 1.oo baje mynsngi, ha office treikam jong u CEM, ban kyntu ia ki bor KHADC ban pyrkhat sani bha halor katei ka Village Administration Bill namar ha kawei ka liang ki pynpaw ia jingangnud ban ioh ka ka AIN bad RULE shnong, hynrei ha kawei ka liang ki don bun ki kyndon hapoh katei ka BILL kiba donkam ia ki jingbatai kiba shai ba kin long kiban iada ia ka riti dustur jong ka Dorbar Shnong, Dorbar Raid bad Dorbar Hima. Ka Dorbar ka la pynpaw ia ka jingsyngew khia halor ka jingdonkam ban ioh ia ka AIN bri khyndew kaba shai khnang ba ki bor Sorkar bapher bapher kin ioh ka jingshai halor ki khadhynniew jait khyndew hapoh kane ka bri Hynniewtrep.
La rai ruh ban pynsngew ha ki bor KHADC ba kin da pyrkhat sani bha halor ka Section 13 .Village Development Council bad ki la kyntu ia ki bor KHADC ban pynkhamti ia kitei ki kam baroh jong ka VDC hapoh ka jingpyniaid jong ki Dorbar Shnong, namar ha baroh ki Hima ki la don lupa ka i) Dorbar Shnong, ii) Executive Dorbar Shnong, iii) Local Committee (Development) bad iv) Ka Village Court, kumta ka Dorbar ka kyrpad jur ia ki bor KHADC ba kin pynsangew bad weng noh shwa ia katei ka jingtyrwa VDC bad ban thaw bad pynjari tang ka ka Village Administration Bill
Ha kaba iadei bad ka Amendment jong ka Sixth Schedule ka Dorbar Ki Khlieh Nongsynshar ki la kyntu ia ki bor KHADC ban thaw lad ban pynwandur ia ka Regional Council kaba khlem liang bad kaba khlem party.
U Bah John F Kharshiing, Chairman, Ka Dorbar ki Khlieh Nongsynshar Ka Ri Hynniewtrep, u la pynpaw ruh ba ha kaba iadei bad ka jingpynsngew jong kiba bun ki Sordar Shnong bad Rangbah Shnong halor ka jingphiah MDC Constituency, ka Dorbar kam lah ban ong ei ei namar ka dei ka bor jong ka KHADC bad ka dei ka kam jong ki seng sain pyrthei. U La ong ba ka Sixth Schedule kumba ka long mynta ka dei na ka bynta shiphew tylli ki ADC ha ka thain lam Mih-ngi, bad ka jingjied ia ki MDC sha ki Autonomous District Council ka long ha ka nongrim jong ki Political Party, ym shym la jied nongmihkhmat sha ADC katkum ki Hima, kumta ka Dorbar kam lah ban tuklar ia ka rukom thaw MDC Constituency.
Ka Dorbar Ki Khlieh Nongsynshar Ka Ri Hynniewtrep, ka khot ka wer ia baroh ki Nongsynshar naduh ki Dorbar Kur, ki Shnong, Raid bad Hima bad ia ki Khun Ki Hajar baroh ban ia poi ryntih ha ka 13 August 2013 hapoh Khasi National Dorbar Hall, Mawkhar, Shillong, kum shibynta ban kynmmaw ka jingdap 65 snem ka jingmynjur ka Sorkar India ia ki dulir Instrument of Accession bad Annexed Agreement, ha ka 17 tarik August 1948, bad ia kiba dang sah teng ban pyndep ia ki jingkular.
Ha kane ka Dorbar kiba la poi bad kiba la ia kren ki long u Paiem Niandro Syiemiong, President Federation of Khasi States(FKS), Syiem Hima Maharam, Paiem PM Syiemlieh, Syiem Hima Nongkhlaw, Bah H Skhemlon, Sirdar Hima Mawdon, Secretary, FKS, Bah H Lyngdoh Ryntathiang, Lyngdoh Hima Lyngiong, Joint Secretary FKS, Bah NK Lyngdoh, Lyngdoh Hima Mawphlang, Bah Edward Kurbah, Secy Hima Marbisu, Paiem AM Syiem Malyniang, Acting Syiem Hima Mawsynram, Bah M Ranee, Acting Chief Hima Nongspung, Bah L Basaiawmoit, Myntri Hima Nongkhlaw, Bah M Kharlukhi, Myntri Hima Mylliem, Bah D Syiemlieh, Secretary Hima Nongspung, bad ki Rangbah Shnong ha ryngkat ki riewrangbah.(SP News)
