Shillong, Naiwieng 23: ka Myntri jong ka Tnad pynroi Sor bad kam bylla jong ka sorkar Jylla ka Kong Ampareen Lyngdoh ha kajuh ka por kaba dei peit ia ka labour Department ka la khot da ka jingialang ia ki nongialam jong ka West Khasi Students Union bad ryngkat ki heh Sorkar jong ka tnad Directorate of Employment & Craftman training ha ka 19th mynta u bnai ban ia mir jingmut na ka bynta ban tei noh ia ka permanent building jong ka Tnad I.T.I kaba don ha Nongstoin.
U General Secretary ka WKSU, Sengkmie u samla D. Sun u la iathuh ba ha katei ka jingialang la iatai sani bha na ka bynta ban tei noh ia ka Tnad I.T.I ha ka shnong Sohpian kaba jngai 7 Km na Nongstoin bad kaba don mar syndah bad ka 4th Batallion Nongstoin kaba dei ka jaka kaba biang tam nalor kiwei pat kiba la buh jingtyrwa.
U la ong ba na ka liang jong ka myntri kala pynpaw ruh ba kan leit jngoh kyrpang ia katei ka jaka ban tei ia katei ka jaka ai jinghikai ia ki samla jong ka thain kaba don ha Sohpian bad pynpaw ruh ba la
kumno kumno ha ka taiew ba ar jong u bnai December 2013 kan leit peit hi dala ki jong ki khmat ia katei ka jaka, ha shwa ban pyntrei kam noh ia ka mang tyngka kaba la don ha katei ka Tnad.
Na ka liang ki heh Sorkar jong ka Tnad Directorate of Employment & Craftman Training kiba kynthup ia u Director ba thymmai, Bah B. Hajong bad Bah L. Garod, Joint Director kila pynpaw ba ia kane ka kam kaba la sahteng la slem bah dei ban pynurlong noh nalor bala thikna ban ioh ia ka jaka kaba biang ha kaba na ka liang ka tei ka Tnad kala dep jurip dang ha ki bnai kiba la dep, iathuh u bah Sun.
Shuh shuh u la ong ki heh katei ka tnad kila pynpaw ruh ba hadien bala pynbiang lut ia ki jongdonkam ha ki kot ki sla yn pyntrei noh shait shait ia ka jingtei ia katei ka ophis ioh kan sahkut noh ne tuit noh shawei pat.
Na ka liang ki nongialam jong ka Seng ki pynpaw ka jingsngew nguh ia ka jingshim khia da i Kong Ampareen Lyngdoh Myntri ka Tnad pynroi Sor bad ruh ba dei peit ia ka I.T.I ba kala lah ban pynbeit bad pynbiang ia ki jingdon kam jong ki paidbah jong ka thain West bad ka long ruh ka jingkyrkhu kaba khraw ia ki samla pule jong ka thain lyngba katei ka skul ai jinghikai nangne sha khmat ong u Bah D. Sun General Secretary W.K.S.U Sengkmie.(SP News)
