Shillong,Lber 25: Ka UDP youth wing ka la pynpaw ia ka jingsngew diaw kaba jur halor ka jingiakawang ktieh ha ki lad pathai khubor hadeng u bah Paul Lyngdoh u kyrtong MP jong ka UDP bad u bah Ardent Basaiawmoit u Chief Executive Member ka Khasi Autonomous District Council (KHADC).
U bah Hamlet Dohlieng u Vice-President jong ka Youth Wing mynta ka sngi haba ia kren ha ki nongthoh khubor u la ong ba ngi kwah ban pynshai ia ka jingshah kynthoh palat jong u bah Ardent pyrshah ia u bah paul bad kane ka jingkynthoh jubor ka long naduh ka election MLA, MDC bad kumjuh ruh mynta ka election MP bad ka la long ruh bun bun sien, bad mynta ka kynti ngi ku ka youth ngim lah shuh ban shu sngap.
Ka UDP ka don ka nongrim ban iathuh sha ki paidbah ha ki jaka ialap election ba ka seng UDP ka kyrshan ia ka ARPA bad ka UDP ka da ai ka jingkyrshan kaba pura ia ka ARPA hapoh ka khasi Hill Autonomous District Council namar ba ki kwah ha KHADC ban ioh shynshar da ki seng riewlum ong u bah Dohlieng bad ngi kwah ruh ba ARPA kan bteng beit ha kine ki san snem.
Ha ka juh ka por u bah Dohlieng u la ong balei u bah Ardent un tuklar ia kata ka jingkwah jong ka UDP ban pynieng ia u bah Paul Lyngdoh kum u kyrtong ha ka MP election namar kane dei ka kam iing jong ki bad ba ma ki hi ibit ia u ba kin pynieng, kane ka dei ka jingkwah jong ki kumta kim don hok ban tuklar halor kane,bad ka wei ruh kumno u bah Ardent un tip ia kata jingrem jong u bah Paul ha ka Elektion MP kane ka dei ka ei ka ei ka bym lah ban pdiang.
Ka UDP youth wing kan pyrshang ban pynkynduh markhmat ia kine arngut ha shwa ka Elektion MP ka long ban khot lang sha ka jingiakren,kim kwah ba kine kiei kiei baroh kin jia bad kim kwah ba ka jingbym ia sngewthuh jingmut kan wan,bad ka UDP ka kwah ba ARPA ha KHADC kan neh ha kine ki san snem .(SP News)
