Shillong, Rymphang.15: U Myntri Rangbahduh (MR) jong ka Ri India, U Dr. Manmohan Singh ha ka sngi Thohdieng u la buh ka jingkular ia ki nongthep vote ka Jylla ba ka Congress kan trei na bynta baroh ki kynhun balang jong ka imlang sahlang khlem da kyntait iano iano bad ruh ban kynthup ia kito kiba dang sahdien.
Haba kyntu ia ki paidbah ka Jylla Meghalaya ba kin ai ka jingkyrshan ia ka Congress ha ka 23 tarik u Rymphang jong ka ilekshon ingdorbar ha ka jingialang paidbah kaba la long ha Madan Polo ha ka sngi Thohdieng, u Singh u la ong, “Ngin trei na bynta baroh ki kynhun jaidbynriew khamtam bad ki briew jong kane ka Jylla kiba dang sahdien.”
“Yn pynkhamti ban pyniaid hi ia ki bor shnong bad ban ailad ia ki longkmie ban kren laitluid ha ka jingpyniaid ia ki kam ki jam bad da kane ngi ngeit kan iarap shibun ia ka Meghalaya ban ioh kham bun ki jingiarap na ka sorkar kmie ban pyntreikam ha ka Jylla” ong u Prime Minister.
Haba pynbna ia ki kam kaba ka sorkar kaba la lam khmat da ka Congress-Meghalaya United Alliance ha ka Jylla bad ka sorkar pdeng UPA, u Singh u la ong, “Ka UPA ka la lah ban kot sha kiba bun ki thong khamtam ban ialeh nban pynduh jait ia ka jingduk kaba la ban naduh ki por mynshuwa.”
“Ka jingduk kala hiar naduh ka snem 2004 kaba long 2.5 % naduh myn ha ki 10 snem bala dep.
U Myntri Rangbahduh u la ong ruh ba ka Meghalaya kadei kawei na ki Jylla kaba la kiew sted ha ka liang ka roi ka par ym tang ha kane ka thain shatei lammihngi, hynrei ha ka ri hi baroh kawei.
“Ka Jylla Meghalaya ha ka liang ka ioh ka kot ka la kiew arshah sha ka 4000 klur tyngka ha ki lai snem ba la leit kaba paw shai ba ka la tam na ka target jong ka 11th Plan,” ong u MR.
Ha kawei ka liang, u la iaroh ruh ia ka sorkar Jylla ha ka jinglah jong ka ban ai ia ka jingling shida jong ka ha ka rukom treikam, ka jinglong khuid bad ka jingdon jong ki bor pyniaid kiba treikam bha ban peit ia ka bha ka miat jong u duk u suk.
Haba kren halor ka jinglah jong ka sorkar Jylla ban tehlakam ia ka jingpep skul ba shiteng por jong ki khynnah, u Singh u la ong kane prokram ka lajan kot sha baroh ka pyrthei ha primary level.
U Myntri Rangbah u la pynbna ruh ia ki kam pynroi ba ka sorkar Jylla ha ka jingialam ka Congress ka la lah ban leh kum ha ka liang ka horticulture, agriculture, power bad tourism.
Na ka liang u Myntri Rangbahduh u la pynbna ruh ba hapoh u snem 2014 ka jingshna ia ka surok ha ka Jylla kum ka four lane na Shillong sha Guwahati, ban pynheh ia ki surok na Shillong-Nongstoin-Tura, Shillong-Silchar bad ki artylli ki bypass Shillong bad Jowai kin sa dep.
