Shillong, Nohprah 14:Ka shnong Rongmesek kaba jngai tang 
3 km eiei na surok GS Road shen kan sa long kawei na ki jaka shangkai pyngngad ba pawnam ha Ri Bhoi District bad ha ka jylla hi baroh kawei.
Watla ka long kaba dang sahdien ha ki surok bad ki lynti ki syngkien, ba kam pat don ia ki surok rong kum kiwei ki shnong pynban kan sa kup ia ka dur ba itynnad da ka jingleit niuh kjat ka tnad Tourism ha katei ka shong hynne ka sngi Palei.
U Bah Kenedy Khriem, Parliamentary Secretary ka sorkar Jylla ba dei peit ia kam shangkai pyrthei ula leit jngoh ia katei ka shnong bad u lum Mawkyndur hynne ka sngi ryngkat bad u Dr Ceslestine Lyngdoh. MLA ka Umsning konstitwensi, ka Kong RC Sohklet, Director ka tnad Tourism, bah Plielad Tiewsoh Chairman ka Ri-Bhoi Tourism & Environmental Development Forum (RBTEDF) u Rangbah shnong Rongmesek bah Albinus Timung bad kiwei ki ophisar.
Haba kren ubah Kenedy ula pynpaw ka jingkmen ia ka jingtrei shitom ki paidbah nongshong shnong bad ka dorbar shnong baroh kawei kiba la lah ban shna ia ka pung kaba itynnad bad ia u lum Mawkyndur ban pynlong ia ka jaka shangkai pyngngad ban khring ia ki briew na shabar jylla bad ki shnong ban marjan.
“Ka tnad tourism kan sa iarap na bynta ban pynitynad ia ka pung kaba la shna da ka shnong hapoh ka jingpeit jong ka Rongmesek Promotion Society ban shna ia ki jaka shongkai, ka lieng bad ki iing shong pyngngad harud katei ka pung,” ula ong bad bynta ba ka jingshna pynitynnad ia ka pung bad u lum kam ai jingmyntoi lada ym don ka surok ba biang ki briew kim lah ban leit ban wan khamtam ha ka por lyiur.
“Ka jingtrei shitom jong phi ryngkat bad u MLA, nga tharai kam don jingeh ban ioh ia ka surok ha kaba ki briew na shabar jylla bad na kiwei ki shnong ka Ri Khasi Jaintia kin sa wan ban shangkai pyngngad ha katei ka pung bad kumjuh ha halor lum Mawkyndur,” ula ong.
U Dr C Lyngdoh ula ong, “Ngi don ia ka spah mariang kaba itynnad ba U Blei ula ai, ka shong ha ngi ban pyndonkam bad ngim dei ban pynjot ia ka jingitynnad ka mariang. Ka long kaba donkam ban pynneh ia ki khlaw ki btap namar u briew bad ki mard kim lah ban im khlem ki khlaw.”
Ula iaroh ia ka jingtrei shitom ki paidbah kiba la lah ban shna ia ka pung kaba itynnad bad khamtam ia ka surok halor u lum Mawkyndur bad na ka liang jong u kum u nongmihkhmat un sa thaw ki lad na bynta ban iarap ia katei ka shnong bad khamtam ia surok khnang ba ki paidbah ka thain bad ki nongwan shangkai pyngngad kin suk.
Kaba sngewtynnad shuh shuh ka long ba na utei u lum Mawkyndur lah ban iohi kyndiang ia u lum Mawkasiang (Himalaya) uba don shatei ka Ri India, u lum Shillong, Lum Kyllang bad ki shnong ha Ri Bhoi District.
Ha jrong utei u lum ki don ki mawbynna kiba jrong bad itynnad kiba don ka History kaba pyntik ia ka dohduh bad mynsiem ki paidbah shaphang ka jingim ki longshwa mynshwa.
Ia kane ka prokram la pyniphuh iphieng shuh shuh da ki jingrwai bad shad tynrai kynthup ia ka kru sing. Ka shnong ka la pynkup burom ruh ia ar ngut ki rangbah kynthup ka longkmie kiba la trei shitom bad len lade na bynta ka roi ka par hapoh ka shnong.(SP News)
