Shillong, Iaiong 29: U I G BSF u Sudesh Kumar IPS, ha ka jingialang paidbah kaba la long ha Rongra South Garo Hills, u la ong ba na ka liang jong ka kynhun shipai BSF kin sa pynlong ia ka jingpynrungkam kaba kyrpang ha ka kynhun BSF ia ki samla kiba dei na ki thain khappud bad ka Bangladesh.
Kane ka jingpynrungkam kaba kyrpang ka la sdang naduh ka 22 tarik mynta u bnai bad kan kut ha ka 27 tarik jong u bnai Jymmang u ban wan, na ka bynta ka jylla Meghalaya yn pynlong ha ki lai jaka, ha Tura, Shillong bad Jowai.
Yn tang kata na ka liang jong ki shipai BSF kin ai ruh ka jinghikai kaba kyrpangna ka bynta ki samla ka jylla Meghalaya kumno ba kin ialeh ia ki examin bad kiwei kiwei ki jingdon kam.
Na ka liang jong u ne u heh shipai jong ki BSF u la ong ba ki paidbah jong ki shnong bapher bapher kiba don ha khappud bad ka Bangladesh ki lah ban ai jingmud sha ki BSF kumno ban pynbha ha kaba pahara ia ki khappud.
Ha kane ka sngi la sam ruh ia shibun ki tiar sha ki briew jong ka South Garo Hills kiban long ki jingmyntoi ia ki paidbah bad ia ki riew shimet bad kum juh ia ki khynnah skul. Na ka liang jong ki BSF ki kwah ba ki paidbah kiba im ha khappud kin ioh ia ki jingmyntoi, la ong u IG BSF.(SP News)
