SHILLONG, Kyllalyngkot 06: Ka kynhun kaikhlaw Achik National Volun-teers Council (ANVC-B) ha dien ka jingiakren bad ka sorkar kan sa leit batai pynshai sha ki khlieh nongsynshar shnong bad kiwei pat ki nongia-lam Garo halor ki katto katne ki mat kiba iadei bad ka jingiakren iasuk bad ka sorkar ba la pyn-long ha ka Sngi Saitjain ha Shillong.
“Ngin sa ia kynduh ia ki khlieh nongsynshar bad kiwei ki nongialam jong ka imlang sahlang shen ban batai ha ki halor ki mat jong ka soskular iasuk”, la ong u Chairman ka ANVC-B, u Rimpu Ma-rak, ha ka kyrwoh ba la pynmih hangne.
Ki jingiakren ban wanrah ia ka jingiabeit kaba neh halor ka jingeh ha Rilum Garo la pynlong hapdeng ki ar tylli ki kynhun jong ka ANVC, ka Sorkar India bad ka sor kar Meghalaya. Ki jingia kren ki long kiba seisoh bad baroh ki kynhun ki la pynpaw ba ka jingiasoi soskular ka la thikna.
U Rimpu u la iathuh ba ki paidbah kin ioh jingmyntoi na katei ka soskular. “Ka ANVC-B ka la iasoi ia ka soskular iasuk ban wanrah ia ka jingsuk sha ki paidbah. Ngi la iasoh lang bad kane ha ka kynta kaba khatduh ban pynthikna ia ka jingsuk bad ban wanrah ruh ia ka jingkylla ha ka liang ka roi ka par bad ban kyntiew ia ki thain kiba la shah kheuin bein, khamtam eh ki thain ba sah ki Garo”, u la ong bad bynrap ba ia ka jingkyang jong ka ban wanrah jingkylla la dep ioh sngew.
U Rimpu u la ong ruh ba ka kynhun jong u ka angnud ban pynioh ia ka synshar paidbah naduh ki kyrdan ba ha trai duh ha ryngkat ka kyndon ban pynioh jingmang pisa beit na ka Sorkar India.
“Ia kane ka jingdawa la pdiang bad kynthup ha ka soskular, bad pynlong iangi shi bynta jong ka jingiasoi soskular”, u la ong bad bynrap, “Ka jingiakhih jongnga ka long ban wanrah ia ka jingkylla ha ka imlang sahlang, bad Nga ngeit ba kane kan urlong lyngba ka jingai bor sha ki paidbah ha ki kyrdan kiba shapoh bad ban pynshlur ia ki paidbah ha ka ban iashim bynta ha ka roi ka par bad ka synshar khadar”.
Kawei na ki jingdawa ba ha khmat jong ka ANVC ka long ban thaw ia ka Garoland Autonomous Council kumba long ka Bodoland Territorial Council.
Hynrei, ka sorkar jylla ka la pynshai ba kam lah ban pdiang ia kata namar ba ka Rilum Garo ka la don lypa ia ka Autonomous District Council hapoh ka Sixth Schedule jong ka Riti Synshar ban peit ia ka bha ka miat jong ki paid trai muluk. Baroh ar, ka sorkar India bad ka sorkar jylla ki la mynjur ia ki 13 tylli ki mat jingdawa jong ka ANVC ba kynthup ia ka jingpyniar ia ki iktiar jong ka District Council.(SP News)
