Shillong, Lber 22: Ka ophis u Deputy Labour jong ka West Khasi Hills District kala pynmih ia ka jingpynbna ha akba kala mana tyngeh ba ym dei ban pyntrei bylla ia ki khynnah kiba dang hapoh 14 snem ka rta kumba la kdew ha ka Child Labour (Prohibition and Regulation) Act, 1986.
Kane ka jingmana kadei na ka bynta ka jingpyntrei bylla ia ki khynnah ha ki karkhana shna kali, par dewiong,ka jingshna ia ki bom pataka, ka jingshna ia ki mar kiba lah ban bthei.La mana ruh ban pyntrei ia kine ki khynnah kiba dang don hapoh 14 snem ka rta ha ki jaka pynmih dewbilat, ki kam maramot bad pynbha ia ki kali, ki kam welding, ki karkhana ot dieng, ban tylliat mawria bad pynpra ia ki mawthup, ban shna tyre,ban leit tam ia ki nuit,ban trei bylla ha ki restaurant, hotels, dhaba bad kiwei kiwei.
Kiba pynkhein ia kane ka kyndon kin shah pynshitom da kaba shah set ha phatok ka bym duna ia ka 3 bnai bad kaba lah ruh ban pynjlan sha ka shi snem ryngkat bad ka shah dain kuna T.20,000.(SP News)
