Shillong, Kyllalyngkot 29: Ban pyniasoh kham bha ia ka Ri Bangladesh bad kane ka dong shatei lam mih ngi jong ka Ri India, ka Ri Bangladesh ka la shim ia ka rai ban pynher ia ki liengsuin jong ka ar sien shitaiew na Dhaka sha Guwahati bad ia kane yn sdang naduh ka shi tarik Naitung mynta u snem.
U High Commissioner jong ka Bangladesh sha India u Tariq A Karim, ha ka jingwan jngoh ka jong u ia kane ka jylla Meghalaya u la ia kynduh ia u myntri rangbah ka jylla u Dr Mukul Sangma bad ha kane ka jingiakren la iathuh ba ka lieng suin Biman Airlines kan sdang noh ia ka jingpynher ia ki liengsuin na Dhaka sha Guwahahti.
Haba kren ha ki nongthoh khubor mynta ka sngi u tei u heh jong ka sorkar Bangladesh sha India u la ong ba ha kaba sdang kin pyndon kam da ki lieng suin kiba la tip kum ki ATR bad kin sa peit lada ka jingialeit ia wan jong ki birew ka kiew kin sa pyndon kam da ki lieng suin kiba heh kiba la tip kum ki Boeing 737.
Kumba ka long mynta ki dang pan shuh ia ki lieng suin, u la ong ba ka Jet Airways kaba na India mynshuwa ka la sdang ia kane ka jingpynher ia ki liengsuin jong ka na Guwahati sha Dhaka hynrei ka la pynkut noh ia kane ka jingiateh kular ha u risaw 2012. Kumba ka long mynta ka Jet Airways kala kwah biang ban sdang ia kane ka jingpynher ia kine ki lieng suin.
La ong ba lada ka Jet Airways ka sdang ruh kampher kane kan dang pynbun ia ki lieng suin kiba iaid sha kane ka jaka da saw sien ha ka shitaiew, la ong u Karim. Kumba ka long mynta ka kad liengsuin ha Guwahahti ka dei ka International Air port kumta kin pynia soh ba katei ka kad liengsuin.(SP News)
