Shillong, Nailar 28: U Symbut Myntri rangbah ka jylla ba dei peit ia ka tnad pynroi sor u bah Sniawbhalang Dhar haba jubab ia ka jingkylli jong u bah Adelbert Nongrum halor ka jingthmu ban shna jaka ieng kali ha Nan Polok bad Phan Nonglait Park, la ong ba ka sorkar kala shim khia ban pynwan dur ban pyntrei ia ki kam pynroi bad ha ka juh ka por ban pynneh pynsah ia ka mariang.
Ka rai ban pyneh ia ki surok bad ban shna ia ka jaka ieng kali ha Nan Polok bad Phan Nonglait Parl la shim ha dien ba la bishar bniah namar ka jingdon kam ban pynlait ia ka jingkhap ngiah kali ha kane ka nongbah Shillong, ka jingthmu ka long ban pynsuk ka leit ka wan bad ha ka juh ka por ban pynnepynsah ia ki jingtei nam u mynbarim.
Ha ka juh ka por u myntri la pyntip hapoh ka iing dorbar ba ka jingthmu ban shna ia ka jaka ieng kali ha Nan Polok dang pynkhreh ia ka DPR, katba ia ka Phan Nonglait Park dang dei tang ha ka jingthmu bad ka sorkar lada ka shna ruh kan pynthikna ba pynduna ia ka jingot ia ki dieng kumba la leh ha NEIGRIHMS.
Ban pynlait ia ka jingkhapngiah kali ha kane ka nongbah Shillong ka sorkar kala shim bun ki lat ki lynti, da kaba shna thymmai ia ki jaka kiba la don bad ka sorkar kala phah jurip ruh ban peit kiwei ki daw kiba wan rah ia ka jingkhap ngiah kali, da ka jingiatreilang ka tnad pulit, ka tnad pynroi sor bad la pan jingmtu ruh na ka IIM Shillong.
Ki surok ha nongbah Shillong ki long tang 80% bad ka jingiar ka jong ki surok ki duna ia ka 7.5 meter, ka jingdon ki jaka ieng kali ki don dang 305-40%, kat ba ka jingkiew ka jingdon ki kali ka long haduh 17.5% tang ki kali ki riew shimet.
Haba jubab ia ki jingylli bynrap na ki dkhot ka iing dorbar, u myntri la ong ba ka Nan Polo ka heh 16.27 Akar bad ka jingthmu ban shna jaka iing kali ka long 4.8 Akar, katba ka Phan Nonglait Park ka don 8.5 Akar, la ong ba ka sorkar kan bishar ia ka jingai jingmut ban pyniaid Odd bad Even number ia ki kali ki riew shimet.
