Shillong, Kyllalyngkot 03: Ka NEHUSU ryngkat ka Hynñiewtrep Youth Council NEHU Unit mynta ka sngi ki la pynlong ia ka jingiakhih ha khmat ka office MBOSE halor ka jingpynslem ka sorkar ban pynlait ia ka bai bam ki khynnah pule, kaba dei jong u snem 2022-2023
Halor ka jingpynslem ka sorkar ban pyllait ia kane ka pisa na ka liang u General Secretary ka NEHU SU u samla Banpynbiang Riang u la pynpaw ba ka buh jingeh ia ki samla pule khamtam kito kiba wan na ki longing ba duk.
U samla Banpynbiang u la ong ba kane kam dei shuh ka sien ba nyngkong ba ki samla pule ki hap mih madan ban iakhih tang na ka bynta ka Scholarship.
Ha kajuh ka por u la pyntip ba kin ai por ia ka sorkar 10 sngi ban pynlait noh ia ka pisa bad lada hadien jong kata ka sorkar ka dang leh mynthi ka NEHUSU bad ka Hynniewtrep Youth Council nehu Unit kan sa shim da kiwei pat ki sienjam.
Ha kane ka jingiakhih la wan synran lang u President rangbah ka seng Hynñiewtrep Youth Council u Bah Roikupar Synrem ha kaba u la pynpaw ba “Ka Sorkar Jylla kam dei ban ap pisa tang na ka Sorkar Pdeng hynrei kadei ban pyndonkam da ka Contingency Fund ban siew iaka Scholarship lane ka bai bam jong ki samla pule”
U Bah Roykurpar u la ong ba ka HYC ka kyrshan ia ka rai jong ki samla pule ban ai por 10 sngi ia ka Sorkar Jylla bad lada ka Sorkar kam shim khia halor kane, ka seng kan sa shim da kiwei ki sienjam.
