Shillong, Jylliew 01: U Myntri ba dei peit ia ka tnad khyndew bad ka jingshah pynjot ha ka mariang u bah Kyrmen Shylla mynta ka sngi ha ka jingleit sngewlem halor ka jingkhlad noh jong ki saw ngut ki briew na ka jingtwa khyndew hapoh ka shnong Nongpriang.
Ha kane ka jingleit na ka liang jong u myntri bah Kyrmen Shylla bala synran lang u MLA jong ka Sohra u bah Gavin Mylliem kila ia kynduh ia kiba ha iing ha sem jong kiba khlad bad kila ai ia ka jingiarap kaba mar saw lak marwei, ha kane ka jingkynduh na ka liang u myntri u la kular ba ka sorkar kan ai ka jingkyrshan.
Ha kane ka jingleit jngoh ia ki long iing kiba la shah ktah ha kane ka jingpynjot ka mariang na ka liang jong u myntri la ong ba ka jylla baroh kawei ka don ha ka jingshah ktah ha ka mariang, kumta ban long kiba husiar, la ong ba ka sorkar ka long kaba la pynkhreh ban iarap kiba ngat ha ka jingshah lynshop ha ka mariang.
Na ka liang jong u myntri la ong yn sa dang leit ban jngoh ia kiwei ki jaka ruh kiba shah ktah ha ka jingpynjot ka mariang, ka jingiarap kaba ka sorkar kan sa ai kan long katkum ki kyndon kiba la buh. Ha kane ka sngi la don lang ruh u MLA kane ka jaka ha kaba u la ong ba la iohi ka jingduh na kane ka jingtwa khyndew.
