Shillong, Jylliew 28: Mynta ka sngi ka seng “Federation of Person With Disabilities” mynta ka sngi kila ia kynduh ia u myntri rangbah ka jylla u Conrad K Sangma ha kaba kila pynsngew ia ka jingeh ka jong ki kaba kila buh ha khmat ka sorkar.
Ka seng ha kane ka jingiakynduh kila kyntu ia ka sorkar ban pynkiew ia ka baibam jong ki ia kiba la poi ha ka kyrdan klass X ban pynkiew na ka T.1500/- tyngka sha T.3000/- tyngka katkum ka RPWD Act 2016 Chapter V, section 24 clause- (h).
Ka seng kala kyntu ia u myntri rangbah ban pynlait ia ka pisa na ka bynta kiba kiba la apply ia ka jingiarap na ka Chief Minister’s Social Assistance, kiba la apply naduh u snem 2023, namar kim don jingioh da kumwei pat lait noh na kane ka jingioh.
Na ka bynta kiba don ka jingduna ha ki dkhot met kiba trei kum ki Muster Roll ha ki tnad sorkar baper bapher, la kyrpad ia ka sorkar ban kan pdiang noh ia ki kum ki nongtrei sorkar kiba pulra ha ka kyrdanD.
Katkum ka RPWD Act 2016 Chapter VI section 33 (clause i-ii) ka federation ka kyntu ia ka sorkar ba kan thung u wei ban long dkhot hapoh ka MPSC bad DSC ban peit ia ka thung kam thungjam na ka bynta kiba don jingduna ha dkhot met.
Ka sorkar ka dei ban peit ruh kino ki kam kiba lah ban mang na ka bynta ki kam sorkar shuwa ba ka sorkar kan phah pynmih ia ki jingpynbna lait kam, ia kane ka jingkynduh ia u mytri rangbah la ialam da u President bah Ferdinand L Marshilong kum u Chairman bad ka kong Ibadalin Kharbuli General Secretary.
