Shillong, Naitung 10: U Chief Executive Member jong ka KHADC u bah Pyniaid Sing Syiem haba jubab ia ka jingylli u bah B. Rani MDC ka Nongpoh haba ia dei bad ka Khasi Traditional Medicine Institute ha Lum Sohpetbneng la ong ba la dep ban shna ia katei ka jaka.
Kaba sah mynta ka long sa tang ka MeECL ba kan wan buh ia ka Transformer ha katei ka jaka ban ioh ia ka light na ka liang jong ka KHADC kala dep ban siew ia ka pisa sha ka MeECL T.24.70 lak tyngka bad kaba sah mynta ka long ban kin wan buh ia ka Transformer.
Ka ophis kala dep ban shna ruh ia ka top um ha ka jinglut kaba la kot sha ka T.40 lak tyngka bad kane ka top um ka lah ban ngiam haduh shilak litter tam ka um na ka bynta katei ka jaka.
La ong ba ka KHADC kan nym lah ban pyniaid ia kane ka jaka, kumta la khot paidbah ban thep lada don kiba kwah ban pyniaid ia kane ka jaka, ha kane ka jingkhot la don saw tylli ki kynhun kiba wan sha khmat ban pan ban pyniaid.
Haba la khot ia ki ba kin pynshai ia ka jingpyntrei kam ia katei ka jaka lada ki ioh, kaba la pynhun ia ka jingkwah ka KHADC dei ka Centre of Learning Knowledge and Services kaba dei na Shillong.
Ka ophis jong ka KHADC kan sa ia soi ia ka soskular bad katei ka kynhun ban pyniaid ia katei ka jaka bad ka District Council kan don ka jingioh la antad ba kan long kumba T.6 lak tyngka ha ka shisnem.
