Shillong, Nailar 06: Ka St Dominic’s College kum shibynta ban pynsngew thuh paidbah ki la pynlong da ka Awerness program halor ka phang Gender Equality lane ka jingiaryng kat khlem da niew shiliang ia u Shynrang lane ka Kynthei ia ka ba la pynlong da ka Internal Quality Assurance Cell (IQAC) ha ryngkat ka jingiatrei lang bad ka Meghalaya Human Rights Commission (MHRC) Shillong.
Ha kane ka sngi ka Director General of Police ka Kong I Nongrang ka wan ban long kum ka Kongsan ha ka jingiadon lang ka Dr Rica Lamar ka ba dei ka co- Founder Manbha Foundation bad kiwei kiwei pat.
Ha ba ai jingkren kum ka kongsan na ka liang ka kong I Nongrang ka la pynpaw ba kat kum ki jingtip ba la iohlum ka la ong ba ka jingshah thombor ia ki kynthei ka jur bha bad kane ka dei ka mat ba na ka liang jong ka ka sngew khia bha wat ha pdeng ka jingpynsngew thuh paidbah lyngba ki awerness program ki bapher bapher hynrei ka jingthombor ia ki kynthei ka dang jyllei kat ba dangmih ki sngi.
Ka la ong ruh ha ba ngi phai sha ki cyber crime la ka long ha ka liang ki kynthei ne ki khynnah na ka liang ka tnadpulit ka long kum ka madan thma ha ka ba ki hap ban wat ki lad ki lynti ba ynlah ban ia leh pyrshah.
Ka Kong Nongrang ka la ongruh ba ha ba ngi phai sha ki jingshah thombor jong ki kynthei la ka long ha sor ne Nongkyndong kat kum ki jingkhmih ki ia ryngkat ha ka jingdon ki cases.
Ha kane ka sngi la ioh ruh ia ka jingkren na ka Satrupa Battacherjee founder jong ka Jharna Foundation la ioh ruh ia ka jingkren na ka Dr Rica Lamar. La ioh ia ki kyntien pdiang na ka Principal Dr Smita Basu bad ki kyntien ai khublei na ka kong Unity Khongjoh.
