Shillong, Nailur 05: Ha Meghalaya dang bun ki paidbah nongshnong shnong kiba khlem pat pynrung kyrteng ia lade ha ka skhim Meghalaya Health Insurance Schme (MHIS) na mar ba kim don Aadhaar.
Ka sorkar pdeng kala pynmih ia ki jingbthah kiba la kham slem ba kino kino ki jingmyntoi kiba don jingiadei bad ki skhim jong ka sorkar pdeng hap ban pyniasoh bad u Aadhaar khlem kumta kin nym lah ban ioh ia ka jingmyntoi.
La ioh jingtip ba bun bah ki briew kiba na kylleng jong ka jylla tang namar ba kim pat don ia u Aadhaar kim lah ban pynrung kyrteng ha ka MHIS namar ha kane ka don ar bynta ka skhim jong ka sorkar pdeng bad jong ka sorkar jylla ia kaba don kam ia u Aadhaar.
Ki paidbah mynta kila sgnewthuh shai ba don kam ia ka Aadhaar namar ka skhim MHIS kala ia rap shibun ia ki don ia ka haba ki leit ban shah sumar ha ki hospital kiba la ia the bad ka sorkar jylla kiba pdiang ia ka MHIS.
Ka dei ka jingshisha baka la don ka rai jong ka iing bishar ba ha khlieh duh jong ka Ri India ba ka shong ha ki briew shimet ban pdiang ne em ia u Aadhaar bad ka sorkar ruhka khlem khang, hynrei lada don kam ban ioh ia ki jingiarap na ka sorkar hap ban don Aadhaar.
