Shillong, Nailur 12: U bah Pyniaid Sing Syiem Chief Executive Member jong ka KHADC u la pyntip ba kum ka dak ban pynpaw ia ka jingsngewsih ba khlad noh u MDC jong ka Nongthymmai u bah Latiplang Kharkongor, la ai ban ai shuti shiteng sngi la shai ka sngi.
U bah Pyniaid ha ka kyrteng jong ka Executive Committee bad baroh ki MDC jong ka KHADC u la phah ia ka khubor sngewlem sha kiba ha iing ha sem ki long ki jor kiba ia jan bad u bah Latiplang ia kane ka khubor sngewlem halor ka jingkhlad nah u MDC ka Nongthymmai.
U CEM ka KHADC u la ong ba ka long ka jingduh kaba khraw ia ka KHADC namar ha kane ka khep kaba mynta ar ngut ki CEM barim jong ka KHADC kila khlad noh, u bah Teinwell Dkhar bad u bah Latiplang Kharkongor, ka jingkhlad jong ki ka long ka jingduh kaba khraw.
Ha kine ki saw sien lynter ka jingjop jong u bah Latiplang kum u MDC ka kren shai ba long u briew kiba ki paidbah ki ieit bad ha kine ki snem u la noh syniang shibun ha ka imlang sahlang bad jaidbynriew bad ka Council baroh kawei.
U bah Latiplang u la shah jied ruh kum u CEM jong ka KHADC bad la long ruh u EM ba dei peit ia ka tnad khaii pateng bad kum u MDC u la noh syniang shibun sha ka jaidbynriew ha kine ki snem jong ka jinglong nongmih khmat.
