Shillong, Nailur 29: Ka Meghalaya State Kickboxing Association [MSKA] ka dap da ka jingsngew sarong ban pynbna ba kawei na ki thei ïalehkai Kickboxer ba pawkhmat jong ka synjuk, ka Daniella I W Mylliemngap kan sa ïoh ban mihkhmat ïa ka ri India ha rynsan ïakhun jong ka ‘Asian Kickboxing Championship 2024’ ka ban long ha Cambodia naduh 6 tarik haduh 13 tarik u Risaw, 2024.
Lah ban kdew ba ïa kane ka lympung ïalehkai la pynlong hapoh ka jingpeit jong ka Asian Kickboxing Confederation bad ka World Association of Kickboxing Organisations (WAKO IF). Kumta ka Daniella W Mylliemngap kan ïasoh bad ka kynhun WAKO India Kickboxing Federation jong ka ri India ha ka 4 tarik Risaw, 2024 shuwa ban leit sha Cambodia.
Kane ka rynsan ïakhun ka long na bynta ka jingïaknieh rung sha ka World Games ka ban long ha China (2025). Na ka liang jong ka Meghalaya State Kickboxing Association ka kitbok kitrwiang ïa ka Daniella ba kan ïalehkai bha ryngkat ka jingkyrmen ba kan wanrah jingjop ban jam sha ka kyrdan kaba kham shalor ha ka World Games.
Ha kajuh ka por, ka MSKA kaba la seng ha u snem 2017, ka la pynpaw ïa ka jingsngewnguh ïa baroh ki nongshimbynta bad kiba la ai ka jingkyrshan khamtam ïa u Myntri Rangbah ka jylla bad Myntri ka tnat ïalehkai kiba la ai mynsiem bad pynlah ïa ka Daniella W Mylliemngap ban poi shaduh kane ka kyrdan.
