Shillong, Risaw 01: Ka Central Bureau of Communication (CBC) Shillong, hapoh ka Tnad Information & Broadcasting mynta ka sngi ka la rakhe ia ka RashtriyaPoshanMaah 2024 da kaba pynlong ia ka prokram ai jingtip halor ka bam kaba tei ha shnong Jaidoh ha West Khasi Hills District. Ka prokram kalong ruh shi bynta ka campaign kaba dang pynlong mynta kylleng ka ri, ka Swachhata Hi Seva.
Kum ka dak ka jingpynkut ia ka PoshanMaah 2024, bad ka jingai jinghikai ia ki paidbah shaphang baroh ki skhim jong ka sorkar kaba phaikhmat ban kyntiew ia ka koit ka khiah, ka CBC Shillong ka la pynlong ia ka jingialang ha ryngkat ka jingiatreilang bad ka Child Development Project Officer, ICDS Nongstoin
Kine ki dei ki tnad ba dei khmih kum ka tnat ka koit ka khiah, C&RD, Horticulture bad ka Office DPO (ICDS-CELL). Ka jingphaikhmat kalong ban kyntiew ia ka jinglong jingman ki longkmie ha ka jingioh ia ka bam kaba tei, ki longkmie kiba dang pun khun bad kiba dang ai buin, bad ki khynnah hapoh hynriew snem ka rta kumjuh ruh ki khynnah kynthei ba dang khie samla.
La sdang naduh 1 tarik haduh 30 tarik Nailur 2024, ka RashtriyaPoshanMaah kaba 7 ka phaikhmat halor ki jingeh kum ka jingdunasnam, ka jingpeitngor ia ka jingheh jingsan, ka jingai kiwei kiwei ki jingbam, bad ka sienjam “PoshanBhiPadhaiBhi,” ha ryngkat ka jingpyniasoh ia ka teknoloji ban kyntiew ia ka jingai jingshakri ka Sorkar.
Ka campaign ka ban jur halor ka jingiaineh ka mariang lyngba ka sienjam ‘EkPedMaaKeNaam”, ka kyntiew ia ka jingthungdieng ha baroh ki Anganwadicenter. Haduh mynta, kumba 12 klur tylli ki prokram la pynlong ha kane ka PoshanMaah da ki jylla bad ki union territory bapher bapher.
Haba kren shaphang ka jingkongsan jong ka PoshanAbhiyan, u Kongsan, Bah EvanmiLyngdoh, EAC, West Khasi Hills u la kyntu ia ki paidbah ban iashim bynta ha baroh ki prokram hapoh ka campaign.
U la ong ba ka jingkyntiew ia ka skhim jong ka sorkar ha kanokano ka shnong ka lah ban urlong tang lada ki nongshong shnong kilong kiba koit ba khiah bad ki briew ki lah ban long kiba koit ba khiah lada don ka jingsumar kaba bha naduh ka por ba dang kha.
Ka PoshanAbhiyankadei ka skhim kaba phaikhmat ban kyntiew ia ka jinglong ka koit ka khiah jong u briew naduh ka por ba dang kha, u la bynrap. U Bah Lyngdoh u la pynshlur ruh ia ki paidbah ban bud ia ki jingai jingmut ba iadei bad ka rukom bam ba la pyllait da ka Tnat ka koit ka khiah bad ka Tnat Women & Child Development jong ka sorkar India.
Ka Kong O.C Nongbri, DPO (ICDS- CELL) ka la ban jur halor ka jingkongsan ‘ban bam da ka jingsngewthuh”, ki jingbam kiba tei kiba lah ban ioh ha ka thain, ki bynta jong ka bam, ka jingbun ki jait bam bad ka jingkongsan ka koit ka khiah jong ki khynnah, ki longkmie bad ki khynnah kyntheikiba dang khie samla na ka bynta ka imlang sahlang kaba bha.
Ka la pynbna ruh shaphang ki kot lyngkdop ba la pynkhreh da ka office halor “Ki bynta jong ka bam, ka jingpynkhreh ia ki jait bam, ki jingai jingmut halor ki rukom bam,” ba la pyllait paidbah ha kane ka jingialang.
Ha kane ka jingialang la don ki prokram bapher bapher ba iadei bad ka deiriti. La don ka jingiakop halor ki longkmie bad ki khun kiba koit ba khiah ha ki 100 sngi ba nyngkong, ka jingpyni ia ka bam kaba koit ba khiah bad kaba tei da ki nongtrei Anganwadi, ki Accredited Social Health Activist (ASHA) bad ki Self-Help Group.
La pynlong ia ka jingeksamin ia ka koit ka khiah bad ka jingtest ia ka jing duna snam na ka bynta ki longkmie ba dang pun, ki khynnah bad ki khynnah kynthei ba dang khie samla da ki nongtrei jong ka Nongkynjang Health and Wellness Centre hapoh ka tnat ka koit ka khiah.
Ki nongioh jingmyntoi ICDS kiba hap ha ka rta 3 haduh 6 snem, ki khynnah pule jong ka St. Anthony’s Hr. Sec. School, Jaidoh, ki dkhot jong ki SHG ki la iashim bynta ha ki jingrwai tynrai bad jingshad, kaba la pynphuhpynphieng ia kane ka jingialang.
Ha kane ka jingialang la pynkup burom ruh ia ki nongtrei Anganwadi bad ki Lady Supervisor jong artylli ki distrik, West KhasiHills bad East West Khasi Hills, namar ka jingnohsynniang ba khraw jong ki ban kyntiew ia ka koit ka khiah bad ka bam kaba tei ia ki longkmie bad ki khynnah ha ki shnong.
La sam ia ki khusnam sha ki nongjop jong ki jingiakop bapher bapher bad la aiti ia ka jingiarap pisa sha kawei ka longiing kaba don ki khun, ba hap hapoh ka Severely Acute Malnutrition, ban iarap ia ka longiing ban ioh ia ka bam kaba tei na ka bynta ki khun.
Ka Kong B. Rynjah, CDPO ICDS Nongstoin ka la kren shaphang ka jing thmu jong ka prokram bad ha kane ka jingialang ka la pdiang sngewbha ia baroh ki nongshah khot sngewbha bad ai jingkren shaphang ka jing thmu jong ka prokram.
U Gopajit Das, Media & communication officer, Shillong u la pynpaw ka jingkmen jong u ban sakhi ia ka jingiashim bynta shitrhem ki paidbah ha kane ka prokram bad u la pynshlur ia baroh ki tnad ba dei khmih ban bteng ban pynlong ia ki prokram ha ki shnong khnang khnang ban lah ban poi sha baroh ki briew.
Ha kane ka prokram la don ruh ki resource person na ka Tnat ka koit ka khiah ba la mihkhmat da ka Kong R. Nongsiej, LHV ha kaba ka la ban jur shaphang ka daw tynrai jong ka jingpang duna snam, ka daw jong ka jingdunasnam, ki dak bad ki lad jingiada.
Lyngba ka jingkiew ki case Rabies ha ka jylla, ka LHV ka la ai jinghikai ruh ia ki briew shaphang ka jingma na ka Rabies, ki dak jingpang kumjuh ruh ki lad jingiada.
Ka la pynshlur ruh ia baroh ki briew kiba ri ksew ban long kiba don jingkitkhlieh bad ban pyndep ka jingai tika ia baroh ki jingri jong ki ha ka por ban lait na kinokino ki jingma ba iadei bad ka koit ka khiah. Ka jingialang ka la long kaba jop bad la pynkutia ka lyngba ki kyntien ai khublei na i Kong D.M Syiemlieh, Lady Supervisor, ICDS Nongstoin.
