Shillong, Naiwieng 06” ka Agatha K Sangma mynta ka sngi ka 5 tarik u Naiwieng 2024 ka la shimti ia ka shuki kum ka chairperson ba thymmai jong ka State Commission for Protection of Child Rights (SCPCR) bad ka la kular ban trei na ka bynta ka bit ka biang jong ki khynnah ha kane ka jylla.
Ka Agatha K Sangma ka la leit ban ia kynduh ruh ia u myntri ba dei peit ia ka tnad social welfare u bah Paul Lyngdoh hadien ba ka la wan ban ia shimti kum ka chairperson.
Haba kren bad ki lad pathai khubor, Ka Agatha ka la ong, “Hooid ka jingthung kam ka la jia katto katne bnai mynshwa hynrei nga la don ha ka met ka bym koit bym khiah bad kumta, mynta ka sngi nga la rung officially bad nga sngewkmen shibun namar nga sngewthuh ba ka dang don shibun kiei kiei kiba nga dei banleh . .”
Halor ka jingkiew jong ki kam runar pyrshah ïa ki khynnah, ka chairman ba thymmai ka la ban jur ïa ka jingdonkam ban ïatreilang bad ki paidbah khnang ban pynbiang ïa ka jaka kaba kham shngaiñ ïa ki khynnah ban shong ban sah.
“Nga kyrmen shisha kum ka imlang sahlang ngi nang kham sngewthuh bad ngi nang long ka ka imlang sahlang kaba kham pura. Kam dei tang shaphang ka kam jong ka komishon hynrei kumno ki shnong ki thaw jong ngi, ki longïing, ki skul, ki nonghikai bad kumno baroh ki pynphriang ïa ka jingtip bad ki ïatreilang. Ngi dei tang ka bynta kaba rit hynrei ngi kwah ban ïatreilang bad ka imlang sahlang khnang ban pynthikna ba ki khun jong ngi kin ïoh ïa ka jaka kaba kham shngaiñ ban shong ban sah,” ka la ong.
Haba pynpaw ïa ka jingsngewkhia halor ka jingpynslem ban buddien stet ïa ki POCSO cases , ka Sangma u la ong, “Ngi hap ban trei halor kane bad kam dei tang ïa ka Jylla Meghalaya hynrei ïa ka Ri hi baroh kawei, ki POCSO cases kim da long kiba sted than.”
“Ki don ki iingbishar kiba stet hynrei phi iohi namar ba ka don ka jingpynshitom ia ki runar ka lah ban dei da ka ba set shi jingim. Kumta kam dei kaei kaei kaba tang ka Meghalaya ka ïakynduh hynrei ka dei ha baroh kawei ka ri bad kumta, ngi hap ban ïatreilang bad u myntri kumta nga don hangne ban ïakren bad u mynta ka sngi bad ban khot ïa u bad ban rah ïa ka shakhmat,” ka la bynrap.
