Guwahati, Kyllalyngkot 06: Ka Tnad Fisheries, hapoh ka Tnad Fisheries, Animal Husbandry bad Dairying jong ka sorkar pdeng, ka la pynlong ia ka ‘Northeastern Region State Meet’ ka sngi ban peit bniah ka jingpyntreikam ia ka Pradhan Mantri Matsya Sampada Yojana (PMMSY).
La pyniaid da u Myntri Sorkar Pdeng Rajiv Ranjan Singh, bad la sakhi ka jingiadonlang u George Kurian, Myntri Khynnah ba dei khmih ia ka MoFAH&D, Prof. S.P. Singh Baghel, Mo FAH&D bad kiwei kiwei ki kynrem ki lyndan na ki jylla ka thain shateilammihngi ha kane ka jingialang.
Ha ka jingkyntiew kaba kongsan ia ka kam ri dohkha ha ka thain shateilammihngi, u Myntri Sorkar Pdeng u la pliepaidbah bad buh maw nongrim na ka bynta 50 tylli ki projek ha ka jinglut kaba T. 50 klur, kynthup ka bynta jong ka sorkarpdeng kaba long T. 38.63 klur.
La saindur ia kine ki sienjam ban pyniar ia ki jingdon jingem ba iadei bad ka kam ri dohkha ha ka thain, ka jingseisoh bad ki lad ioh kam ioh jam. Ka Assam ka ioh 12 tylli ki skhim, Manipur 7, Meghalaya 1, Nagaland 3, Tripura 3 bad ka Sikkim 24 baroh 50 tylli.
Napdeng kine ki projek ha Assamkadei ka jingplie ia ka Integrated Aqua Park ha Darrang District, kaba la antad ban pynmih 150 MT ka dohkha ha ka shi snem, ka ban pynmih jingkamai T. 10-15 klur bad plie lad ioh kam haduh 2,000.
Ka Jaka ri Dohkha ha Kamrup District kan pynmih 20,000 MT ki jingbam ha ka shi snem, katba ki projek pynmih symbaidohkha ha ki district bapher bapher ki thmu ban pynmih 50 million ki symbaidohkha ha ka shi snem, ka ban kyntiew ia ka kam ri dohkha ha ka thain.
Ka Manipurkansakhi ka jingplie ia ki jaka pynmih thah bad ki jaka buh pyndaitthah ha Thoubal bad Imphal District ban pynnehpynsah ia ki dohkha bad pynduna ki jingduhnonghadien ba la lum.
Shuh shuh, ki jaka pynmih symbaidohkha kiba pynmih ia ki donkha ba kongsan ha ka thain kin nohsynniang sha ka jingpynnehpynsah ia ki jingdon jingem ka mariang ban pyniar ia ka kam pynmih dohkha ha ka jylla.
Ki projek ha Meghalaya kin phaikhmat ban kyntiew ia ki jaka ri dohkha ha East Khasi Hills District. Kane ka sienjam, kaba phai sha ki jaka kiba don ha ki jaka jngohkai ba pawnam, la antad ba kan khring ia ki nongwanjngohkai, ka ban plie lad ioh kam ha ka thain bad kyntiew ia ka kam jngohkai jong ka thain.
Ki lai tylli ki projek ha Nagaland kin kynthup ka jingshna ia ki jaka pynmih symbaidohkha ha Mokokchung bad Kiphire district. Kine ki jaka pynmih symbaidohkha kin pynmih 21 million ki dohkha ba dang rit ha ka shi snem, ka ban kyrshan ia ka kam ri dohkha ha ka thain bad plie ki lad kamaikajih ia ki briew ha ka thain.
Ha Tripura, ki projek kin kynthup ka jingplie ia ki jaka ri dohkha bad ki jaka pynmih symbaidohkha.Kine ki sienjam ki thmu ban pynbun ia ka jingpynmih ia ki dohkha, bad plie ki lad ioh kam ioh jam.
Ka Sikkim kan pyntreikam 25 tylli ki projek ba kynthup ka jingplie ia ka Recirculatory Aquaculture Systems (RAS) ban kyntiew ia ka kam ri dohkha kaba iaineh, ka jingshna ia ki jaka die dohkhaha Gangtok bad kiwei kiwei ki sorbah, bad ka jingkyntiew ia ka kam ri dohkha. Kine ki projek kin kyntiew ia ka ioh ka kot bad ki lad kamaikajih jong ki briew ha ka thain.
Ka thain shateilammihngi ka long kaba kongsan ha ka jingiaid lynti ka India sha ka jinglah pyndap ialade ha ki kam dohkha, bad ka dei ka dak jong ka jingkut jingmut jong ka Sorkar na ka bynta ka roi ka par ia baroh.
Namar ka jingbun ki jaka shong um bad ka jingbun ki jait jingim kiba im ha ka um, ka thain shateilammihngi ka dei ka thain kaba bun bha ki lad bad ka jaka pdeng jong ka roi ka par hapoh ka jingialam lynti jong ka Sorkar.
La ithuh ia kane ka thain kum kaba riewspah bha ha ki jingthung bad ki mrad, bad kumta kane ka thain ka long kaba kongsan bha ha ka rukom treikam jong ka India na ka bynta ka jingkiew ka ioh ka kot bad ka jingkyntiew ia ka kamaikajih.
