New Delhi, Kyllalyngkot 11: Ha ka jingialang National Youth Day, ka jingpyndon burom ia ka lyngkhuh sngi kha jong u Swami Vivekananda, u Myntri Rangbah duh Narendra Modi un iashim bynta ha ka Viksit Bharat Young Leaders Dialogue 2025 ha ka 12 tarik Kyllalyngkot ha ka por kumba 10 baje mynstep ha Bharat Mandapam, New Delhi. Un iakren bad 3,000 ngut ki samla na kylleng ka ri. Un ai jingkren ruh ha ka jingialang.
Ka Viksit Bharat Young Leaders Dialogue ka thmu ban pynkylla ia ka dustur kaba la don 25 snem ka jingpynlong ia ka National Youth Festival ha ka rukom kaba rim. Ka iahap bad ka jingkyntu u Myntri Rangbah duh ha ka sngi rakhe ioh jinglaitluid ka ri ban kynthup ia 1 lak ngut ki samla ha ka kam sain pyrthei khlem ki jingpyniasoh bad ka kam sain pyrthei bad ai ka rynsan ia ki ha ka ri ban wanrah ia ki jing thmu jong ki na ka bynta ka Viksit Bharat, sha ka jingshisha.
Ha kaba iadei bad kane, ha kane ka National Youth Day, u Myntri Rangbah duh un iashim bynta ha ki prokram bapher bapher ba la saindur ban ai mynsiem, ban pynshlur, bad pynkup bor ia ki nongialam ban wan jong ka ri. Ki samla kin pyni shiphew tylli ki jingpyni lyngba ka powerpoint ia ki kam kiba pyni ia man ki shiphew tylli ki phang ba kongsan na ka bynta ka roi ka par jong ka India, ia kiba yn pyni hakhmat jong u Myntri Rangbah Duh. Kine ki jingbatai ki pyni ia ki jing thmu ba thymmai bad ki lad ki lynti ba la wanrah da ki samla ban weng ia katto katne ki jingeh jong ka ri.
U Myntri Rangbah duh un pyllait ruh ia ka thup jong ki jingthoh essay ba tbit da ki nongiashim bynta halor ki shiphew tylli ki phangpdeng. Kine ki phangpdeng ki kynthup ia ki bynta ba iar kum ka teknoloji, ka jingiaineh, ka jingpynkupbor ia ki kynthei, ka jingshna tiar bad ka kam rep.
Ha ka jinglong jingman kaba kham pher, u Myntri Rangbah duh un iasohlang bad ki samla na ka bynta ka jingbamja sngi, kaba plie lad ia ki ban iasam ia ki jing thmu jong ki, ki jingshem, bad ki jingangnudmarkhmat bad u. Kane ka jingiakren kan pyndap ia ka jaka ba suda hapdeng ka rukom synshar bad ki jingangnud jong ki samla, ka ban kyntiew ia ka jingsngew longtrai bad jingkitkhlieh hapdeng ki nongiashim bynta.
Ha kane ka Dialogue, ka ban sdang naduh ka 11 tarik Kyllalyngkot, ki samla kin iashim bynta ha ki jingiakop, ki prokram bad ki jingpyniia ka deiriti. Kan kynthup ruh ia ki jingiamir jingmut halor ki phangpdeng ban ialam da ki nonghikai bad ki riewshemphang. Yn sakhi ruh ia ki prokram deiriti bad ka jingpyni ia ki drone, kaba pyni ia ka jinghiar pateng ka jingsaindur jong ka India kaba pyni ruh ia ka jingkiew shaphrangkatkum ka juk mynta.
La jied 3,000 ngut ki samla ban iashim bynta ha ka Viksit Bharat Young Leaders Dialogue, lyngba ka Viksit Bharat Challenge, ka jingjied katkum ka jingwanshakhmat, ka jingjied ba bun bynta ban ithuh bad pyni ia ki sur na kylleng ka ri. Ka kynthup lai tylli ki bynta bad ki nongiashim bynta kidei kiba naduh 15 – 29 snem.
Ka bynta ba nyngkong, ka Viksit Bharat Quiz, kaba la pynlong ha 12 tylli ki jait ktien na ka bynta ki samlla na baroh ki jylla ban iashim bynta, bad la sakhi ka jingiashim bynta kumba 30 lak ngut ki samla. Ki nongiashim bynta ba jop ha ka quiz ki jam shaphrang sha ka bynta kaba 2, ba iadei bad ka jingthoh essay, ha kaba ki pynsngew ia ki jingthmu jong ki halor shiphew tylli ki phang ba kongsan ban pynurlong ia ka thong “Viksit Bharat”, kaba la sakhi palat 2 lak tylli ki essay ba la phah.
Ha ka bynta kaba 3, ka State Round, 25 ngut ki kandidet ha man ka phang ki la ioh ban iashim bynta ha ki jingiakhun. Man ka jylla ka ithuh ia ki lai ngut ki nongiashim bynta ba wan shakhmat na man ka phang, ha kaba la wanrah ia ki kynhun na ka bynta ka prokram jong ka ri ha Delhi.
1,500 ngut ki nongiashim bynta na ka Viksit Bharat Challenge Track, ki mihkhmat ia 500 tylli ki kynhun ba wan shakhmat na ka State Championships; 1,000 ngut na ka Traditional Track, ba la jied lyngba ki youth festival ha ki jylla, ki prokram deiriti bad ki exhibition halor ki phangpdeng jong ka jingsaindur thymmai ha ka Science & Technology; bad 500 ngut ki nongprat lynti, ba la shah khot namar ki jingnohsynniang jong ki ha ki bynta bapher bapher kin iashim bynta ha kane ka Dialogue.
