Shillong, Iaiong 11: Ka kong Lasubon Nongkynrih khun jong u bah Leonel Chyne bam kwai ha dwar ublei bad Kong Menola Nongkynrih ba dei na Mawlong Diengsiar, Shella bad kaba shong ba sah mynta ha Nongrah Nongpdeng, Shillong ka la ïoh ïa ka kyrdan Doctor of Philosophy (PhD) na ka Khasi Department, North Eastern Hill University.
Ka kong Lasubon kala thoh ia ka thesis jong ka halor ka phang “Ka Kyrdan u Rangbah ha ka Pyrkhat Khasi: Ka Bishar Bniah ïa ki Sawangka ba la Jied” hapoh ka jingialam bad btin lynti jong ka Prof. Streamlet Dkhar, kaba dei pei shnat pule khasi , NEHU, Shillong.
Ka kong Lasubon mynta ka trei kum I Assistant Professor ha JJM Nichols Roy College, Shillong. Ha kane ka Wad Bniah (Research) jong Ka Dr. Lasubon Nongkynrih ka la ktah ia ki mat jingkylla ha kaba ïadei bad ka kyrdan U Rangbah Khasi ha ïing kur ïing khun, ha ka imlang sahlang bad ha ka synshar khadar.
Ka kong Lasubon kala pyndep ïa Ka jingpule BA (Khasi) na Sohra Government College bad bud sa Ka MA (Khasi) Gold Medallist bad MPhil (A Grade) halor ka phang “Ka Pyrkhat Khasi Halor Ka Rap-Ïing Bad Ka Tingkhun: Ka Bishar Bniah Halor Ki Nobel Ngam Banse Bad U Kyrdoh Mawlynnai”na kajuh hi ka Skulbah NEHU, Shillong.
