Shillong, Iaiong 23: Ka Dorbar Raid Kharpati Raid kaba hap hapoh ka jingpeit jingkhmih ka hima Mylliem Syiemship ha ka 22nd April 2025 ka la pynlong ia ka jingleh niam Chorong-Lang-Palu–Domahi lane ka pynsum masi ha ChorongLang-Palu-Aghat, Purduwa Kharpati.
Ka Chorong-Lang-Palu–Domahi ka dei ka jinglehniam ba shisien shi snem bad kaba long shi bynta ban ai ka nguh ka dem ia ki blei hashuwa ka aiom ban sdang ia ki kam rep kam riang ban hiar sha ki lyngkha bad ki pynthor ban thung ban thep ki jingrep ba ha rukom.
“Ka kyntien “Domahi” ka wan na ki ar tylli ki kyntien Karbi “DOM” bad “AHI”. Ka kyntien “DOM” ka wan na ka ktien “Ka Chirdom” kaba mut “Ka Jingainguh” katba ka kyntien “AHI” pat kamut ia “ki dak ki shin”.
Kumta, ka kyntien “DOM-AHI” ha ka ktien Karbi ka thew shaphang ka kyntien “Arnam ka Chirdom AHi” kaba mut “Ka Jingainguh ia U Blei Trai Kynrad Nongbuh Nongthaw jong ki uba dei U ‘lei lum ‘lei Wah”
Ka Raid Kharpati (Hoppati) kaba dei ka Raid kaba dang bat ban pynneh pynsah ia ki Riti Dustur ba naduh hyndai hynthai ki ju pynlong ki jingleh niam leh rukom ter pa ter kumba dei ban leh.
Ka Raid Kharpati ka dei kaba don shibun ki rukom lehniam leh rukom kum ka Ason ka luk-dar, Wo ki hlo, Inglong karkli, Ingphar karkli, Chorong-Lang-Palu, Dom-ahi ki kan, Wur bangthin, Wur kiti bad ka Rong ki pan.
Ha kane ka sngi la wan ban long kongsan da u Bansan Nongkseh u Nathaniel Thangkhiew ha ka jingdon ryngkat u Acting Syiem ka Raid u Robertus R. Kleiñ lem ki Sangot ki Doloi.
Ha kane ka sngi la pyndep ka kñia ka khriam ka nguh ka dem ka duwai ka phirat kat kum ka niam ka rukom, ka Chorong-Lang-Palu–Domahi ka la kut ha ka phuh ka phing lyngba ki jingpud jingtem ka jingrwai ka jingshad tynrai ba la iashim bynta da ki paidbah.
